UzAuto Motors 2024 йил январидан Chevrolet Gentra (Lacetti) седанини ишлаб чиқаришни тўхтатади. Бу ҳақда компания матбуот хизмати «Газета.uz»га маълум қилди.
Қарор GM Global сиёсати билан боғлиқ. Gentra учун бутловчи қисмлар ишлаб чиқарувчи корхоналарнинг ишлаб чиқариш қуввати янги моделларга йўналтирилади, дея таъкидлади компания.
Ишлаб чиқаришни тўхтатиш режалари 2022 йил декабрь ойида эълон қилинганди. Автомобиль моделларининг ҳаёт цикли ҳақидаги слайдда Gentra`нинг цикли 2023 йил охирида тугаши кўрсатилганди. Худди шундай белгилар Spark ва Nexia моделларида ҳам кўрсатилган — уларнинг ишлаб чиқарилиши 2022 йил охирида якунланган.
Компания 2023 йилнинг иккинчи чорагидан Cadillac автомобилларини (General Motors`нинг ҳашаматли автомобиллар бренди) сотувга чиқаришни режалаштирганди. Бироқ компания «Газета.uz»нинг бу бўйича саволига ҳозирча маълумот йўқ, дея жавоб берди.
Эслатиб ўтамиз, Chevrolet Lacetti седанининг йирик блокли йиғилиши Асака автомобиль заводида 2003 йилда ташкил этилган. 2008 йилда ушбу автомобилни тўлиқ ишлаб чиқариш бошланган. Беш йил ўтгач, ушбу моделнинг янгиланган версияси тақдим этилган.
