UzAuto Motors 30 октябрдан бошлаб автомобиллар харид қилиш бўйича шартномалар қайта тикланиши ҳақидаги миш-мишларни рад этди.
«Бугун бир қанча автоиҳлосмандлар автомобиллар учун контрактация бошланганлиги тўғрисидаги миш-мишларга ишониб, эрталабдан дилерлик марказларига келишгани сабабли дилерликларда катта навбатлар юзага келди. Эслатиб ўтамиз, сотув бошланганлиги тўғрисида ва бошқа мурожаатлар бўйича маълумотларни UzAuto Motors`нинг расмий каналларидан олишингиз мумкин», — дейилади хабарда.
Компания шунингдек, автомобиль учун шартномани нафақат Chevrolet дилерлик марказларида, балки UzAuto Motors иловаси (iOS/Android), Telegram бот ва savdo.uzavtosanoat.uz сайтида ҳам онлайн тарзда олиш мумкинлигини таъкидлади.
Эслатиб ўтамиз, 2022 йил декабрь ойидан UzAuto Motors тўртта оммабоп автомобиль моделларига шартнома тузишни тўхтатганди. Компания бундай қарорни микрочиплар етишмаслиги ва логистика муаммолари билан изоҳлади.
Август ойида компания Lacetti, Cobalt, Damas ва Labo учун шартномалар тузишни қайта тиклади ва бир кунда 51 мингдан ортиқ шартнома тузди. Сентябрь ойида эса бир неча соат ичида яна 28 минг автомобилга шартнома тузилди.
Октябрь ойи ўрталарида компания ўзининг Chevrolet Lacetti, Cobalt, Damas ва Labo автомобиллари нархини оширди. Нарх ўртача 5,1 фоизга ошди.
