Тошкент шаҳар Ички ишлар бош бошқармаси бошлиғининг биринчи ўринбосари Дониёр Тошхўжаев 12 декабрь куни бўлиб ўтган матбуот анжуманида рейдлар давомида жиноий фаолиятда гумон қилинаётган шахсларнинг қўлга олиниши ҳақида гапирди.
ИИББ вакилининг сўзларига кўра, у август ойида ўз лавозимига киришгач, «узоқ вақтдан бери тайёргарлик кўрилган» жиноий гуруҳ вакилларини қўлга олиш бўйича йиғма жилдлар билан танишишган.
«Бу ишлар анча аввал, мендан олдин бошланган… Фақат уларни ушлашимиз шу кунларга тўғри келди. Нега уларни 27 ноябрда қўлга оляпмиз? Албатта, рейдларни ўтказиш масаласи ўша куни ҳал бўлиб қолмади, бир ҳафта ичида муҳокама қилинди. Ҳисоботлар келяпти, биз ҳеч ким жавобгарликдан қочиб қутула олмаслигини кўрсатамиз, чунки бизда етарли далиллар бор», — деди у.
Дониёр Тошхўжаев, шунингдек, ҳибсга олинганларнинг хатти-ҳаракатларига якуний баҳони тергов ва суд беришини айтди ҳамда улардан жабрланган фуқароларни «қўрқмасликка» чақирди.
«Биз фуқароларимизга, халқимизга мурожаат қилиб, қўрқманглар, демоқчимиз. Албатта, уларнинг аризаларисиз ҳам ушланганларни жавобгарликка тортиш учун бизда етарлича далиллар бор. Лекин уларнинг қилмишларидан жабр кўрганлар бизга мурожаат қилса яхши бўларди», — деди у.
Жабрланганлардан 71−206−45−69, 71−206−49−46 ёки 102 ёки 99−370−73−94 Telegram рақами орқали бошқармага мурожаат қилишлари сўралган. Ариза берувчининг шахсий маълумотларининг махфийлиги кафолатланади.
Эслатиб ўтамиз, жиноий фаолиятда гумон қилинган шахсларнинг ҳибсга олингани ҳақидаги илк хабарлар 27−28 ноябрь кунлари эълон қилина бошланди.
Ўтган ҳафтада Тошкент шаҳар ИИББ ходимлари «Саидазиз медгородок» лақаби билан машҳур Саидазиз Сайдалиевни қўлга олган. Бошқарма маълумотларига кўра, у ва яна бир неча киши товламачилик иши бўйича гумонланувчи сифатида ҳибсга олинган. Маълум қилинишича, улар пул эвазига одамларни қарзини ундириб берган.
3 декабр куни Ўзбекистон ҳуқуқ-тартибот идоралари ходимлари «Бахти Ташкентский» лақаби билан танилган Бахтиёр Қудратуллаев ва у билан яқин жиноий алоқаси бўлгани қайд этилган Достон Халилов ушланди.
Шунингдек, «Салимбой» ва «Салимбойвачча» номлари билан танилган 73 ёшли тадбиркор Салим Абдувалиев процессуал тартибда ушланган. Унга нисбатан қамоққа олиш эҳтиёт чорасини танланган. Жиноят ишининг айблови ўзгартирилиб, янада оғирроқ жазо назарда тутилган.
Бундан ташқари, Тошкентда аввал ҳам «криминал авторитет» сифатида қамалган Аббосхон Ходжаев қўлга олинган.
Ушланганлар ҳақида қўшимча маълумотларни қуйида ўхшаш хабарлар орқали ўқиш мумкин.
