Футбол бўйича Ўзбекистон миллий терма жамоаси 2026 йилда Ашхободда жаҳон чемпионатига саралаш турнирининг 2-босқичи дастлабки ўйинида Туркманистонни мағлуб этди (1:3). Учрашувдан сўнг терма жамоа бош мураббийи Сречко Катанец Ўзбекистон ғалабага ҳақли эканини таъкидлади.
«Биз бу ғалабага ҳақли эдик. Йигитларимнинг ўйинидан жуда мамнунман. Улар жуда яхши ўйин кўрсатишди. Бу жаҳон чемпионатига саралаш турнирининг илк ўйини. Шу боис бу ўйин биз учун жуда муҳим эди. Агар бу ўйинда ғалаба қозонмаганимизда эди, бизнинг саралашдан ўтиш масаламиз… келажакда нима бўлишини ҳеч қачон билмайсиз. Туркманистон бир уриниш билан гол урганига гувоҳ бўлдик. Иккинчи бўлимда ўйинимизни анча яхшиладик, прессинг қўлладик, учта гол урдик ва бундан ҳам кўпроқ гол уришимиз мумкин эди. Йигитларимнинг ўйинидан жуда мамнунман», — деди 60 ёшли мутахассис.
Унинг сўзларига кўра, ўзбекистонлик футболчилар дастлабки дақиқалардан прессинг қўллашди ҳамда «техник ва ташкилий жиҳатдан яхшироқ ўйнади».
Бош мураббий сунъий майдондан нолиб, уни «даҳшатли» деб атади.
«Кеча айтганимдек, бундай майдонларда ўйнаш жуда ва жуда даҳшатли. [Туркманистон терма жамоаси] бундай майдонда ўйнашга кўпроқ мослашган, улар ҳар куни шу ерда шуғулланишади. Менинг жамоам эса йилига бир марта шундай майдонда ўйнаши мумкин. Бу ерда тўп секинроқ ҳаракат қилади, тўпнинг сакраши бутунлай бошқача, ҳамма нарса бошқача. Ҳимояда ўйнаётган жамоалар устунликка эга бўлади. Нега бундай майдонда ўйнашга рухсат беришганини билмайман. Мен дунёда Ўзбекистондан яхшироқ бўлган кўплаб турли жамоаларни кўрдим, уларга мослашиш учун вақт керак ва улар мағлуб бўлишлари мумкин», — деди у.
Аввалги саралашларнинг сунъий майдонда бўлиб ўтган дастлабки ўйинларида Ўзбекистон 2018 йилда Шимолий Кореяга (4:2), 2022 йилда Фаластинга (2:0) мағлуб бўлганди.
Дубль ва голли узатмани амалга оширган учрашувнинг энг яхши футболчиси Отабек Шукуров бундай майдондаги ғалабаси билан жамоа ўз характерини кўрсатганини айтди.
«Бундай майдонда ўйнаб бўлмайди. Ташкилотчилар нима бўлишидан қатъи назар, озгина бўлса-да футболчиларнинг соғлиғи ҳақида ўйлашлари керак…» — дея таъкидлади у.
Сречко Катанец 21 ноябрь куни соат 18:00да Тошкентда Эронга қарши бўлиб ўтадиган ўйин ҳақида гапирар экан, рақиб тажрибали жамоа экани, унинг футболчилари олий лигада тўп сураётганини таъкидлади. Бироқ у «улар билан қандай ўйнашни билади».
«Мен Эронга қарши уч марта ўйнаганман, бир марта ғалаба қозонганман, бир марта дуранг ўйнаганман ва бир марта мағлуб бўлганман. Биз қаттиқ ишлашимиз керак. Лекин мен Эрон терма жамоасига қарши қандай ўйнашни жуда яхши биламан», деди у.
Якунда бош мураббий ҳазиллашиб, Отабек Шукуров ярим ҳимояда эмас, балки ҳужумда ўйнаши керак эди, деди. «Бу менинг хатом. У 7-рақамда эмас, 9-рақамда ўйнаши керак эди», — деди терма жамоа мураббийи.
Статистика
Қатар футбол ассоциацияси ва Осиё футбол конфедерациясининг техник эксперти Алишер Никимбаев 30 йиллик тарихда жамоалар 10 марта тўқнаш келгани, 9 учрашувда ўзбекистонликлар ғалаба қозонганини таъкидлади. Ягона дуранг 1998 йилги Осиё ўйинларида қайд этилган. Миллий терма жамоалар миқёсида Ўзбекистон терма жамоаси Ашхободда бир марта мағлуб бўлган, бироқ бу 1992 йилнинг октябрь ойида бўлган ва ҳар икки футбол федерацияси ҳали ФИФАга аъзо бўлмагани учун мазкур ўйин ФИФА реестрида йўқ.
Унинг сўзларига кўра, кечаги ўйин Сречко Катанецни ўйинлар сони бўйича Ўзбекистон терма жамоасининг энг яхши 5 нафар мураббийи қаторига киритди. Унинг ҳисобида энди 25 та — Равшан Ҳайдаров билан бир хил миқдорда ўйин бор. Ғалабалар сони бўйича эса у ҳозирда Вадим Абрамов (20) ва Миржалол Қосимов (22)дан кейин Самвел Бабаян (16 та) билан учинчи ўринни бўлишиб турибди.
Қолаверса, Ўзбекистон терма жамоаси биринчи марта кетма-кет иккита иродали ғалабани қўлга киритди (Хитой — 2:1, Туркманистон — 3:1). Миллий терма жамоа ЖЧ саралаш турнири доирасидаги сафар ўйинида ҳам кучли иродали ғалабага эришди (аввалроқ уй учрашувларида Қувайтни — 3:2, Қатарни — 5:1 ва КХДРни — 3:1 ҳисобида мажбуриятга учратган эди).
Мазкур ғалаба жаҳон чемпионати саралаш турниридаги 55-, Ўзбекистон терма жамоаси тарихидаги 150-ғалабаси бўлди.
