Ўзбекистоннинг биринчи хоними, Zamin халқаро жамоат фонди васийлик кенгаши раиси Зироат Мирзиёева Истанбул шаҳрида ўтказиладиган «Фаластин учун ягона юрак» саммитида иштирок этади. Бу ҳақда делегацияларни кутиб олган Туркия ташқи ишлар вазири ўринбосари Ясин Экрем Серим Instagram`даги саҳифасида маълум қилди.
У жойлаган видеодан кўриш мумкинки, Ўзбекистон биринчи хонимига Туркияга ташриф давомида унинг кенжа қизи — Ижтимоий ҳимоя агентлиги директорининг биринчи ўринбосари Шаҳноза Мирзиёева ҳамроҳлик қилмоқда.
Саммитда дунёнинг қатор давлат ва ҳукумат раҳбарларининг турмуш ўртоқлари ҳамда махсус вакиллари иштирок этиши кутилмоқда. Хусусан:
- Бангладеш президентининг рафиқаси Ребекка Султана;
- Покистон бош вазирининг рафиқаси Садия Раҳматуллоҳ;
- Малайзия қироличаси Тунку Азиза;
- Ливан бош вазирининг рафиқаси Мей Микати;
- Босния ва Герцеговина президентлик кенгаши директорининг рафиқаси Сабина Комсич;
- Фаластин президентининг рафиқаси Амина Аббоснинг шахсий вакили Фериал Камел Абдаираҳмон Салем;
- Қатар амирининг онаси Шайхо Моза Бинт Носир Ал Миснад;
Долмабаҳче саройида ўтказиладиган саммитда Туркиянинг биринчи хоними Эмине Эрдоғаннинг очилиш нутқидан сўнг, меҳмон хонимларнинг ҳам нутқ ирод этиши кутилмоқда.
Ташкилотчилар саммит Ғазо секторидаги тинч аҳолининг ўлимини олдини олиш ва минтақада тинчлик ўрнатиш учун халқаро ҳамжамиятга бирдамлик сигналини беришига ишонч билдирмоқда.
Аввалроқ Ўзбекистон БМТ Бош ассамблеясининг Ғазода ўт очишни тўхтатишга чақирувчи резолюцияни қабул қилганди. Шавкат Мирзиёев Туркий давлатлар ташкилоти саммитида Исроил-Фаластин можароси ҳақида гапириб, томонларни зудлик билан ҳарбий ҳаракатлар ва ўт очишни тўхтатишга ҳамда сулҳ тузишга чақирганди. Президент «икки халқ учун икки давлат» тамойилини қўллаш тарафдори эканини ва Ўзбекистон Ғазо сектори аҳолисига ёрдам кўрсатиш учун 1,5 млн доллар ажратишини билдирган.
