Корхоналар ва ташкилотларнинг ягона давлат регистри маълумотларига кўра, Ягона умумреспублика процессинг маркази (Uzcard бренди) таъсисчиларининг таркиби яна ўзгарди.
Октябрь ойида Uzcard хусусийлаштирилиб, бешта банкка тегишли давлат улушининг 75 фоизи компаниянинг тўрт нафар таъсисчиси томонидан 210,1 миллиард сўмга сотиб олинганди. Яқингача Мансур Усмонов, Камрон Акбаров, Тимур Азадов ва Обид Агзамходжаевлар компанияда 25 фоиздан улушга эга эди.
Эндиликда 75 фоиз улуш эгаси IMC-Capital ҳисобланади, қолган 25 фоиз улуш эса ўтган йилларда Uzcard бош директорининг молиявий масалалар бўйича ўринбосари бўлиб ишлаган Камрон Акбаровда қолди.
Октябрь ойида компаниянинг устав капитали 42,16 миллиард сўмни ташкил этган бўлса, ҳозирда у 212,75 миллиард сўмга етган.
КТЯДР маълумотларига кўра, IMC-Capital 2022 йил 31 августда рўйхатга олинган ва улгуржи, махсус бўлмаган савдо билан шуғулланади. Uzcard хусусийлаштирилаётган вақтда компания асосчиси Ойбек Турсунов эди, у 2020 йилда Uzcard акцияларига эгалик қилган. Ҳозирда IMC-Capital`га жорий йилнинг 15 июнида БААда рўйхатдан ўтган Berill Holding Company Limited (100 фоиз) эгалик қилади.
Солиқ қўмитаси маълумотларига кўра, 2022 йилда Uzcard айланмаси 501,4 миллиард сўмни, тўланган солиқлар миқдори 31,4 миллиард сўмни, солиқ имтиёзлари эса 132,6 миллиард сўмни ташкил қилган. 2023 йилнинг етти ойида корхона айланмаси 514,3 миллиард сўмни, бюджетга солиқлари 37,6 миллиард сўмни, имтиёзлари 116 миллиард сўмни ташкил этди.
Uzcard таъсисчиларининг ўзгариши
«Газета.uz» 2020 йилнинг май ойида Ойбек Турсунов Uzcard устав капиталидаги 75 фоиз улуш эгасига айлангани ҳақида ёзганди. Ўша йилнинг август ойида у таъсисчилар рўйхатидан чиқди ва 75 фоиз улуш бешта давлат банки — Ўзбекистон миллий банки (51 фоиз), «Ўзсаноатқурилишбанк», «Асакабанк», «Ипотека банк» ва «Алоқабанк»га (ҳар бири 6 фоиздан) ўтди.
2022 йил март ойида иқтисодиётда давлат иштирокини қисқартириш ва хусусийлаштиришни жадаллаштириш дастури доирасида банкларнинг компаниядаги 75 фоиз улушлари Давлат активларини бошқариш агентлигига (Давактив) ўтказилди. Тендер комиссияси Uzcard`даги давлат улушини мустақил баҳоловчи ташкилотни жалб қилган ҳолда баҳолаш йўли билан 75 фоизини сотишга қарор қилди ва шу йилнинг август ойи охирида хусусийлаштириш жараёнини эълон қилди.
«Масъулияти чекланган ҳамда қўшимча масъулияти жамиятлар тўғрисида»ги қонунга мувофиқ, жамиятнинг бошқа эгалари давлатнинг 75 фоиз улушини сотиб олишда имтиёзли ҳуқуқдан фойдаланишлари мумкин. Давлат активларини бошқариш агентлиги шерик мулкдорлар сотиб олишда имтиёзли ҳуқуқдан фойдаланганини маълум қилганди. Давлат улуши Real Excellent Valuation мустақил баҳолаш ташкилоти томонидан баҳоланган нархда сотилган.
2022 йил октябрь ойида Мансур Усмонов, Камрон Акбаров, Тимур Азадов ва Обид Агзамходжаев имтиёзли ҳуқуқдан фойдаланиб, 210,1 миллиард сўмга 75 фоиз улушни сотиб олди.
Ўшанда молиячи Отабек Бакиров МЧЖнинг 75 фоиз улушига эга бўлган давлат нега компания шаклини акциядорлик жамиятига ўзгартирмагани, бу орқали акцияларни очиқ аукционда сотиш ва катта фойда олиш мумкин экани ҳақида савол билан юзланганди. Давлат активларини бошқариш агентлиги раҳбари эса битимга изоҳ бериб, акциядорлик жамияти ташкил этиш учун 50 дан ортиқ акциядор зарурлигини, шу сабабли бундай қилинмаганини айтганди
