Ягона республика процессинг маркази (Uzcard бренди) яна хусусий компанияга айланди, дея гувоҳлик бермоқда Корхона ва ташкилотларнинг ягона давлат реестри маълумотлари.

«Газета.uz» 2020 йилнинг май ойида президентнинг куёви Ойбек Турсунов компания устав капиталидаги 75 фоиз улуш эгасига айланганини ёзган эди. Бироқ ўша йилнинг август ойидаёқ у Uzcard таъсисчилари рўйхатидан чиқди ва 75 фоиз улуш бешта давлат банкига — Ўзмиллийбанк (51 фоиз), «Ўзсаноатқурилишбанк», «Асака банк», «Ипотека-банк» ва «Алоқабанк»га (6 фоизга мос равишда) ўтказилди.

2022 йил март ойида давлатнинг иқтисодиётдаги иштирокини қисқартириш ва хусусийлаштиришни жадаллаштириш дастури доирасида банкларнинг 75 фоиз акциялари Давлат активларини бошқариш агентлигига (ДАБА) ўтказилди.

Тендер комиссияси Uzcard`даги 75 фоизлик давлат улушини мустақил баҳоловчи ташкилотни жалб қилган ҳолда баҳолаш йўли билан сотишга қарор қилди ва август ойи охирида хусусийлаштириш жараёнини эълон қилди.

«Масъулияти чекланган ҳамда қўшимча масъулиятли жамиятлар тўғрисида»ги қонунга кўра, компаниянинг бошқа эгалари давлат акцияларининг 75 фоизини имтиёзли равишда сотиб олиш ҳуқуқидан фойдаланишлари мумкин.

КТЯДР маълумотларига кўра, давлат улуши компаниянинг қолган 25 фоизига эгалик қилган Мансур Пўлатович Усмонов, Камрон Анварович Акбаров, Тимур Махмуджанович Азадов ва Обид Алимджанович Агзамхўжаевга ўтказилди. Энди уларнинг ҳар бири Uzcard`да 25 фоизлик улушга эга.

Эслатиб ўтамиз, ДАБА таъсисчиларнинг ўзгариши ва битим тафсилотлари, шу жумладан, сотилган давлат улуши қийматини ҳали эълон қилгани йўқ.