Давлат активларини бошқариш агентлиги «Ўрта Осиё транс» акциядорлик жамияти устав капиталидаги 51 фоиз давлат акция пакетини 65 млрд сўмга Hyper Partners МЧЖ хусусий корхонасига сотиш бўйича келишувга эришилганини маълум қилди.
Сотув жараёнида Merritz юридик фирмаси бошчилигидаги компаниялар консорциуми хусусийлаштириш бўйича консультантлик қилган. Консультант ва Давактив агентлиги томонидан хусусийлаштириш жараёни доирасида инвестиция тизерлари консультантнинг инвесторлар тармоғи орқали турли хорижий инвесторларга (investor sounding) юборилган.
Хорижий ва маҳаллий инвесторлардан акциялар пакетини сотиб олиш бўйича 3 та мажбуриятга эга бўлмаган таклифлар келиб тушган. Консультантнинг тавсиясига асосан 2 та талабгорлар хусусийлаштириш жараёнининг кейинги мажбуриятга эга бўлган таклифлар қабул қилиш босқичига ўтказилган.
Корхонанинг баҳоланган қийматидан юқорилиги бўйича энг яхши харид қийматини тақдим этган Hyper Partners МЧЖ ХК савдо натижалари бўйича ғолиб деб топилган.
Қайд этилишича, Hyper Partners МЧЖ хусусий корхонаси ва унинг тегишли шахсларидан ҳеч бири Европа Иттифоқи ва АҚШнинг, шунингдек, йирик халқаро молия институтларининг санкциялари рўйхатига киритилмагани тўғрисида тегишли хулоса тақдим этилган.
Hyper Partners МЧЖ томонидан келгусида корхонанинг фаолиятини сақлаш, шу билан бирга, Европа, Хитой ва Марказий Осиё давлатлари орқали ҳаракатланувчи транспорт логистика фаолиятини ташкил этиш, ривожлантириш ва кенгайтириш, жамиятга тегишли ер майдонида янги замонавий божхона терминали ҳамда кўп қаватли автотураргоҳ қуриш режалаштирилган.
Маълумот ўрнида, «Ўрта Осиё Транс» транспорт корхонаси 1992 йилда ташкил этилган, кейинчалик 1995 йилда давлат акциядорлик компанияси ва 1998 йилда «Ўрта Осиё Транс» АЖ сифатида қайта ташкил этилган. Корхона юк автомобиллари билан экспорт-импорт, транзит ва республика ичидаги юкларни (асосан пахтадан тайёр маҳсулотлар, озиқ овқат, ускуналар, қурилиш материаллари, қоғоз, текстиль ва трикотаж маҳсулотлари ва ҳоказо) ташишни ташкил этиш ишларини амалга оширади. Устав капитали 1,484 млрд сўмни ташкил этади.
Корхонадаги 51 фоиз улуш давлатга тегишли бўлиб, қолган 49 фоиз улуш жисмоний ва бошқа юридик шахсларга тегишли ҳисобланади. Корхонани сотиб олиш бўйича келишувга эришган Hyper Partners МЧЖнинг 100 улуши Hyper Partners GMBH компаниясига тегишли.
Эслатиб ўтамиз, Hyper Partners GMBH Tashkent City 3-лотининг асосий инвестори ҳисобланади. Британиянинг Open Democracy нашри 2019 йилда ўтказган изланишларида мазкур компаниянинг (Дитценбахда 2018 йил 22 январда рўйхатга олинган) ягона эгаси 19 ёшда эканини аниқлаганди. Ўшанда Ўзбекистон вазирликлари вакиллари ва Тошкентнинг собиқ ҳокими Жаҳонгир Ортиқхўжаев Tashkent City лойиҳасидаги ёш хориж компаниялари иштироки борасида изоҳ берар экан, бу дунё амалиётида одатий ҳолат эканини таъкидлаган.
