14 июнь куни Европарламент депутатлари Сунъий интеллект тўғрисидаги акт (The A.I. Act) деб номланувчи қонун лойиҳасини маъқуллади, деб хабар бермоқда BBC. Ҳужжат СИдан фойдаланишдаги энг хавфли ҳолатларни чеклаши кутилмоқда.
Қонун лойиҳаси СИ тизимларини тўртта хавф гуруҳига ажратади: қабул қилиб бўлмайдиган, юқори, чекланган ва генератив СИ. Ҳар бир гуруҳ учун назорат чоралари киритилади.
Қонун лойиҳасида, хусусан, жамоат жойларида юзни реал вақт режимида таниб олиш учун СИ технологияларидан фойдаланишни тақиқлаш таклиф этилади.
Бундан ташқари, ChatGPT чат боти каби контент яратувчи тизимлар фойдаланувчиларни уларнинг контенти инсон томонидан эмас, балки компьютер томонидан яратилгани ҳақида огоҳлантириши керак бўлади.
Қонуннинг якуний версияси ҳали Европа комиссияси ва Европа кенгаши томонидан тасдиқланиши керак. Унинг камида 2025 йилдан кучга кириши режалаштирилган. Ҳужжат СИдан фойдаланиш ва ривожлантиришни тартибга солувчи дунёдаги биринчи қонун бўлади.
Аввалроқ энг йирик сунъий интеллект ишлаб чиқувчилари, жумладан, OpenAI ва Google DeepMind каби технологик компанияларнинг бир гуруҳ олимлари ва раҳбарлари ўз технологиялари хавфини пандемия ҳамда ядро урушига қиёслаб, инсониятнинг «йўқ бўлиб кетиш хавфи» ҳақида огоҳлантирганди.
