Сингапур президенти Ҳалима Яқуб Ўзбекистонга давлат ташрифини якунлаб, 25 май куни Uzbekistan Airways миллий авиакомпаниясининг HY511 Тошкент-Сеул рейси билан Boeing 787 Dreamliner самолётида мамлакатдан жўнаб кетди.
«Газета.uz» Ҳалима Яқуб ва унинг турмуш ўртоғи Моҳаммед Абдуллаҳ Алҳабши 23 май куни Uzbekistan Airways самолётида Остонадан Тошкентга учгани ҳақида ёзганди.
Ташрифнинг асосий тадбирлари, жумладан, президент Шавкат Мирзиёев билан музокаралар ва икки мамлакат бизнес-форуми 24 май куни Тошкентда бўлиб ўтди.
25 май куни Ҳалима Яқуб «Афросиёб» тезюрар поездида Самарқандга борди ва у ердан кечки пайт пойтахтга қайтди.
Сингапур президенти ташриф якунларини сарҳисоб қилар экан, сафар самарали ўтганини таъкидлаб, Ўзбекистон Сингапур тажрибасини ўрганишга хайрихоҳ бўлгани, шунингдек, Сингапур компанияларининг Ўзбекистонга бўлган қизиқишини таъкидлаб ўтди.
Википедия маълумотларига кўра, Сингапур президенти, бош вазири ва расмийлари одатда Singapore Airlines миллий авиакомпанияси ёки бошқа ташувчилар томонидан амалга ошириладиган режалаштирилган йўловчи рейсларида саёҳат қилади. Зарур ҳолларда Сингапур ҳукумати мамлакат қуролли кучларининг Airbus A330 MRTT ва Fokker 50 самолётларидан фойдаланиши мумкин.
