UzAuto Motors компаниясига берилган кредит Россиянинг Транскапитал (ТКБ) ва Швейцариянинг Credit Suisse банки ўртасидаги суд баҳсига сабаб бўлди. Москва арбитраж суди материаллари бунга гувоҳлик бермоқда.
АҚШнинг чекловчи санкциялари остида бўлган ТКБ Россияда Credit Suisse`нинг иккита шўъба корхонаси — Банк Кредит Свисс (Москва) ва «Кредит Свисс Секьюритиз» улушларининг ҳибсга олиниши, РОСТ рўйхатга олувчисига у билан ҳар қандай келишувни амалга оширишга эришди. Бундан ташқари, Москва филиалидаги Швейцария банкига тегишли 10 млн евродан сал кўпроқ маблағ ҳисоб рақамлари музлатилган.
Даъвонинг мазмуни
2020 йил охирида Ўзбекистондаги энг йирик автомобиль ишлаб чиқарувчи UzAuto Motors Credit Suisse Лондон филиали билан 150 млн еврогача бўлган кредит шартномасини имзолаган эди. 2021 йил баҳорида ТКБ синдикатланган кредитга қўшилди ва иштирок миқдори сифатида 10 млн евро ажратди.
Credit Suisse Лондон бўлинмаси синдикатнинг агенти сифатида иш бошлади, у битим шартларига кўра тўловни қарз олувчидан қарз берувчига йўналтиради ёки қарз берувчини тўлов олинмагани ҳақида хабардор қилади. Тўлов 19 апрелда амалга оширилиши керак эди, бироқ 20 апрелда АҚШ Молия вазирлиги ТКБга қарши блокловчи санкциялар киритди ва Credit Suisse ўтказишни бошлаган пул Россия банкига етиб бормади.
ТКБ вакилининг РБКга тушунтиришича, банк автомобиль ишлаб чиқарувчиси россиялик кредитор билан мустақил ҳисоб-китоб қила олиши учун Credit Suisse`га музлатилган маблағларни Uzauto Motors фойдасига қайтариш бўйича кўрсатма берган. «Аммо Credit Suisse AG бундай операция санкция остига тушмаслигига қарамай, уларга эътибор бермади», — дея таъкидлади у. ТКБ манфаатларини судда ҳимоя қилувчи Куликовнинг таъкидлашича, Швейцарияда рўйхатдан ўтган Credit Suisse «Америка SDN-рўйхатига амал қилмаслиги мумкин».
«Трансcапиталбанк» Credit Suisse`нинг Россиядаги активларини ҳибсга олиш заруриятини бусиз маблағларни қайтариш қийин бўлиши билан изоҳлади.
Трансcапиталбанк Credit Suisse маблағларини фақат учинчи уринишда музлатиб қўйишга муваффақ бўлди, дея қайд этади «Прайм». Суд муваққат чораларни илгари рад этишни ТКБ уларнинг мақсадга мувофиқлигини оқлаб чиқа олмагани ва ўз даъволарида судланувчининг мол-мулкини музлатиш тўғрисида кўрсатмагани билан изоҳлади.
Апрель ойи охирида «Газета.uz» санкциялар жорий этилганидан сўнг Россиянинг Транскапиталбанки Марказий Осиё банклари билан ҳисоб-китоб қилиш имкониятини йўқотгани ҳақида хабар берди. РБК маълумотларига кўра, Ўзбекистондаги банкларнинг 80 фоизи ТКБда мультивалюта ҳисоб рақамларига эга.
