Ўзбекистон президенти фармони билан Шукрулло Акмалжон ўғли Жаҳонгиров қурилиш вазири ўринбосари этиб тайинланди, деб хабар берди Қурилиш вазирлиги матбуот хизмати.
Шу кунгача вазир ўринбосари лавозимида ишлаб келаётган Шуҳратхўжа Раҳматжонович Ҳошимов бошқа ишга ўтиши муносабати билан лавозимидан озод этилган.
Хабарда айтилишича, тайинловга қадар Шукрулло Жаҳонгиров лойиҳа ва қурилиш компанияларида фаолият юритган.
Апрель ойи бошида «Ўзбекистон 24» телеканалидаги репортажда у Тошкентдаги Янги Ўзбекистон кўчаси ҳақида интервью берган, унинг архитектурасини «эволюцион» деб атаган эди. Унинг лавозими пойтахт ҳокимлиги мутахассиси сифатида кўрсатилганди.
Шунингдек, февраль ойида президентга Олимпия шаҳарчаси қурилиши лойиҳаси тақдим этилгани ҳақида хабар берилган эди. Худди шу телеканал репортажида Шукрулло Жаҳонгиров Mimar Group қурилиш компаниясининг бош архитектори сифатида кўрсатилган.
Mimar Group компанияси «Янги Ўзбекистон» боғи қурилишида, Космонавтлар майдони ва «Шаҳидлар хотираси» ёдгорлик мажмуасини реконструкция қилишда иштирок этган. Ҳозирда компания «Жемчуг» дўкони ва Гагарин майдони яқинидаги боғни таъмирлаш ишларини олиб бормоқда.
