Ўзбекистон ва Европа Иттифоқи Кенгайтирилган шериклик ва ҳамкорлик тўғрисидаги битимни тайёрлашда жуда муҳим натижаларга эришди. Бу ҳақда Ўзбекистон ташқи ишлар вазири Абдлазиз Камилов «Ўзбекистон — Европа Иттифоқи» ҳамкорлик кенгаши йиғилиши якунлари бўйича ўтказилган қўшма матбуот анжуманида маълум қилди. Унинг нутқининг матнли кўриниши ТИВ матбуот хизмати томонидан эълон қилинди.
«Келгуси йил президентимизнинг Брюсселга бўлажак ташрифи чоғида ҳужжатни имзолашни режалаштирган ҳолда, яқин кунларда шартнома лойиҳасини тўлиқ ишлаб чиқиш ва якунлаш ниятидамиз», — деди Абдулазиз Камилов.
Вазирнинг сўзларига кўра, битимда асосий эътибор инсоний ўлчов, демократик ислоҳотлар, инсон ҳуқуқлари, диний эркинликлар, болалар ва мажбурий меҳнат бўйича ўзаро ҳамкорлик масалаларига қаратилади.
«Тасдиқлашим мумкинки, сўнгги бир неча йил давомида биз икки томонлама кун тартибидан инсоний ўлчов билан боғлиқ баъзи муаммоли масалаларни олиб ташладик. Келажакда қилиниши керак бўлган ишлар кўп эканлигини тушунамиз. Шу нуқтаи назардан, биз янги ютуқларга эришиш учун Европа Иттифоқидаги ҳамкасбларимиз билан ҳамкорлик қилишга тайёрмиз», — деди ТИВ раҳбари.
«Бугунги кунда халқаро ҳамжамият Марказий Осиё ва минтақамиз атрофидаги, хусусан, Афғонистондаги вазиятга жиддий эътибор қаратмоқда. Бу бизнинг умумий муаммомиз. Бизнинг қарашларимиз ўхшаш. Бундан ташқари, биз ўхшаш қийинчиликларга дуч келмоқдамиз. Муштарак манфаатлар асосида минтақавий масалалар бўйича ҳамкорликни давом эттирамиз», — деди вазир.
Унинг қўшимча қилишича, кенгаш йиғилишида савдо-иқтисодий ва сармоявий ҳамкорликнинг айрим жиҳатлари кўриб чиқилди.
«Сиёсий кун тартибимизда ҳамкорлигимизни давом эттириш учун келажакда муҳокама қилиниши керак бўлган кўплаб масалалар мавжуд. Лекин, шу билан бирга, сиёсий соҳада ўзаро яхши англашувга эришилди, деб айта оламан. Биз нималар қилинганини ва келажакда нима қилиш кераклигини биламиз», — дея хулоса қилди Абдулазиз Камилов.
