Американинг Миннеаполис шаҳрида яшовчи афроамерикалик Жорж Флойд қўлга олиш вақтида вафот этди. Полициячилардан бири қўлга олинган шахсга кишан тақилгани ва нафас олишга қийналаётганини такрорлаганига қарамасдан, бир неча дақиқа давомида уни томоғидан босиб турган, дея хабар қилди РИА Новости.

Қўлга олинган шахс тасвирланган видео кенг тарқалганидан сўнг шаҳарда норозилик намойишлари бошланди. Аҳоли автомобиль эҳтиёт қисмларини сотувчи AutoZone компанияси биносига ўт қўйди, шаҳарда талончилик бошланган.

"Газета.uz"да реклама

Намойишчилар ҳуқуқни муҳофаза қилиш органлари ходимларига тош ва шиша идишларини улоқтириб, полиция машиналари ойналарини синдирган, дўконларга ўғриликка тушган. Полиция намойиш иштирокчиларига қарши резина ўқлар ва кўздан ёш сиздирувчи газ қўлламоқда. Тартибсизликлар жараёнида отишма содир бўлиб, энг камида бир киши вафот этди.

Полиция Жорж Флойдни 25 май куни дўконда 20 долларлик сохта чекдан фойдаланишга гумон қилиб қўлга олган. Эркак ҳушсиз ҳолатда шифохонага етказилган ва ўша ерда ҳаётдан кўз юмган.

Шаҳар полицияси раҳбарияти қўлга олишда қатнашган тўрт ходимнинг ишдан бўшатилганини маълум қилди. ФҚБ Флойд ўлими юзасидан тергов бошлаган. Миннеаполис шаҳри мэри Жейкоб Фрей қўлга олинган шахсни томоғидан босиб турган полициячини қўлга олишга чақирди. Тартибсизликларга барҳам бериш учун шаҳар маъмурияти АҚШ Миллий гвардиясига мурожаат қилган. АҚШ президенти Дональд Трамп ҳодисани тергов қилишни тезлаштиришга топшириқ берди.

Таъкидлаш жоизки, АҚШда худди шундай ҳолат 2014 йил 17 июлда бошқа бир қора танли фуқаро билан содир бўлган эди. Ўшанда 43 ёшли Эрик Гарнер кўчада ноқонуний сигарет савдоси шуғулланганликда гумон қилиниб қўлга олинган, ўртада чиққан можарода полициячи бўғиб, ўлдириб қўйган эди. Унинг жон ҳолати «Нафас ололмаяпман» деган сўзлари мобиль телефони камерасида тасвирга олинган ва тарқалиб кетган эди. Ҳодиса мамлакатда «Нафас ололмаяпман» шиори остидаги кенг кўламли норозилик намойишларини келтириб чиқарган.