Суд ҳайъати Миннеаполис шаҳрининг собиқ полициячиси Дерек Шовинни афроамерикалик Жорж Флойдни эҳтиётсизлик оқибатида одам ўлдиришда айбдор деб топди. Бу ҳақда CNN`га таяниб Meduza хабар бермоқда.
Собиқ полициячи айбловнинг барча учта банди бўйича айбдор деб топилди. Улардан энг оғири — қасддан содир этилмаган иккинчи даражали қотиллик — 40 йилгача озодликдан маҳрум этишни кўзда тутади.
Дерек Шовинга нисбатан ҳукм тахминан саккиз ҳафтадан кейин ўқилади. Шовиннинг ўзи айбини тан олмади ва судда кўрсатма беришдан бош тортди.
Жорж Флойд Миннеаполисда 2020 йилнинг май ойида ўлдирилган эди. Уни 20 долларлик қалбаки пулдан фойдаланишда гумон қилиб қўлга олишга уринишган эди. Қўлга олиш пайтида Дерек Шовин саккиз дақиқача тиззаси билан Флойднинг бўйнини босиб турган, афроамерикалик нафас ололмаётгани ҳақида бир неча марта айтгани фойда бермаган.
Флойднинг ўлими дастлаб Миннеаполисда, сўнг АҚШнинг қолган барча шаҳарларида, ундан кейин дунёнинг бошқа мамлакатларида ҳам ирқчиликка қарши норозилик намойишларини келтириб чиқарди. Дерек Шовин ва унинг Флойдни ҳибсга олишда иштирок этган икки нафар ҳамкасби полициядан ҳайдалди ва уларга нисбатан айбловлар эълон қилинди.
