Александр Лукашенконинг таъкидлашича, Ryanair авиакомпанияси самолёти бортида бомба ўрнатилганлиги ҳақидаги хабар Швейцариядан келган. Бу ҳақда 26 май куни Беларус президенти парламент аъзолари, конституциявий комиссия аъзолари ва ҳукумат органлари вакиллари билан учрашувда айтди, дея хабар берди ТАСС.
Эслатиб ўтамиз, 23 май куни Афинадан Вильнюсга учаётган Ryanair компаниясининг самолёти бортида бомба ўрнатилганлиги ҳақидаги сигналдан кейин Минск аэропортига мажбурий қўндирилган. Самолёт қўндирилгач, мухолифатчи Nexta Тelegram каналининг собиқ бош муҳаррири Роман Протасевич қўлга олинган.
Шундан сўнг, Европанинг бир қатор йирик авиакомпаниялари Беларус осмонини четлаб ўтган ҳолда парвозларни амалга оширишга қарор қилди.
Беларус президенти Александр Лукашенконинг маълум қилишича, зудлик билан Минск аэропортига қўндирилган самолётда «террорчи» бўлган ва бу ҳақда хорижда билишган.
Унинг таъкидлашича, Ryanair самолёти бортида бомба борлиги тўғрисидаги хабар Афина, Вилнюс ва Минск аэропортларига бир вақтнинг ўзида келган.
Шунингдек, Беларус президенти самолёт билан боғлиқ амалга оширилган ҳаракатлари мутлақо тўғри деб ҳисоблашини ва қарор қабул қилишда мамлакат хавфсизлиги ҳақида ўйлаганини таъкидлади.
Александр Лукашенко самолёт билан боғлиқ воқеани текшириш учун барча халқаро экспертлар таклиф қилинганини ва Ғарб бу воқеани текширишда қатнашишдан бош тортганини эълон қилди.
Бундан ташқари, Беларус президентининг ҳисоблашича, ҳибсга олинган Роман Протасевич республикада «қонли исён» уюштирмоқчи бўлган.
Маълум қилинишича, Роман Протасевич оммавий тартибсизликлар уюштиришда, ҳукумат амалдорларининг қонуний талабларига бўйсунмасликда, шунингдек, ижтимоий адоват ва ихтилофни қўзғаш билан боғлиқ гуруҳ ҳаракатларини ташкил этишда айбланмоқда. У 15 йилга озодликдан маҳрум қилиниши мумкин.
АҚШ президенти Жо Байден ушбу ҳодисага нисбатан чора кўришни буюрди ҳамда самолётнинг мажбурий қўндирилиши ва Протасевичнинг ҳибсга олинишини «халқаро меъёрларни ҳақорат қилиш» деб атади.
НАТО Кенгаши Беларус ҳукуматидан Протасевични ва у билан бирга ҳибсга олинган Софья Сапегани озод қилишни талаб қилди.
Reuters’нинг хабар беришича, Швейцария авиация маъмурлари Минскка қўндирилган самолётда бомба борлиги ҳақидаги маълумотлардан хабардор бўлмаганликлари ва Беларус томонини бу ҳақда огоҳлантирмаганликларини маълум қилишган.
