Қозоғистонда коронавирусга қарши Россия вакцинасини ишлаб чиқариш учун завод очилади. Бу ҳақда мамлакат президенти Қасим-Жомарт Тоқаев маълум қилди.
Унинг айтишича, ушбу лойиҳага сармояларни жалб қилиш бўйича музокаралар аллақачон бошланган.
«Мен Россия президенти билан Россия вакциналарини ишлаб чиқарадиган завод қуриш тўғрисида келишувга эришдим. Ҳукумат аллақачон ушбу зарур лойиҳага сармоя жалб қилиш бўйича музокараларни бошлади», — деди Тоқаев.
Унинг маълум қилишича, ҳозирда энг муҳим вазифа — Қозоғистон вакцинасини ишлаб чиқаришни кечиктирмасдан йўлга қўйиш, вақтинча рўйхатдан ўтказиш тартибини соддалаштириш ва завод қурилишини якунлаш.
Август ойида Россия «Спутник V» дунёдаги биринчи коронавирусга қарши вакцинани рўйхатдан ўтказди. Унинг таркибида COVID-19 компонентлари мавжуд эмас ва инсон аденовирусига асосланган. Ушбу вакцина орқали бемор икки босқичда эмланади. Вакцина фуқаролик муомаласига 2021 йил 1 январдан чиқарилиши режалаштирилган.
