Россия президенти Владимир Путин COVID-19 га қарши илк вакцинанинг рўйхатдан ўтказилгани ҳақида эълон қилди. Бу ҳақда РИА Новости хабар берди.
Владимир Путин, шунингдек, тез орада вакцина омма учун кенг кўламда ишлаб чиқарила бошлаши ҳақида эълон қилди.
Маълумотга кўра, рўйхатдан ўтказилган ушбу вакцина синовларда ўзининг юқори даражада самарадор эканлигини, шу билан бирга, зарарсиз эканлигини кўрсатган.
Вакцина рўйхатдан ўтказилгани ҳақидаги гувоҳнома. Фото: РИА Новости
Ушбу вакцина орқали дастлаб шифокорлар эмланиши ҳақида хабар берилди. 1 январдан бошлаб эса вакцина фуқаролар учун сотувга чиқарила бошланади.
Хабар берилишича, Владимир Путиннинг қизи ушбу вакцина ёрдамида эмланган. Эмлашдан кейин унинг тана ҳарорати 38 даражага кўтарилган, эртаси куни эса 37 даражага тушган.
Бундан олдин, кўплаб фармкомпаниялар Россия соғлиқни сақлаш вазирлигини ушбу вакцинани рўйхатдан ўтказишга шошмасликка чақираётган эди. Улар соғлиқни сақлаш вазирлигини вакцинанинг сўнгги клиник синовлардан муваффақиятли ўтишини кутиш кераклигини таъкидлашди.
Аввалроқ эса Н.Ф.Гамалея номидаги Миллий эпидемиология ва микробиология илмий маркази мутахассислари томонидан ишлаб чиқилган ушбу вакцинанинг биринчи илк синовлардан муваффақиятли ўтгани ҳақида хабар берган эдик.
Ҳозирда коронавирусга қарши вакцина устида кўплаб мамлакатларда ишлар олиб борилмоқда. ЖССТнинг 31 июль куни берган ҳисоботига кўра, ҳозирда 177 хил номзод-вакциналар мавжуд. Улардан 142 таси илмий текширувлардан, 17 таси илк клиник синовлардан, 13 таси иккинчи клиник текширувлардан ва 5 таси учинчи даража клиник синовлардан ўтказилмоқда.
Маълумот учун, ҳозирда дунё бўйлаб коронавирусга чалинганлар сони 20 млн дан ошган. Ўзбекистонда эса COVID-19 дан касалланиш ҳолатлари 31,5 мингга етган.
