Рио олимпиадаси ва жаҳон чемионатининг кумуш медали соҳиби, ўзбекистонлик Бектемир Мелиқўзиев 13 июнь куни профессионал боксда ўзининг биринчи жангини ўтказади. Айни пайтга келиб, унинг дебютдаги рақиби маълум бўлди. Бу ҳақда МОҚ матбуот хизмати хабар берди.
Унга кўра, Мелиқўзиев аргентиналик Мартин Фидель Риосга қарши баҳс олиб боради. Бўлажак жанг Калифорниядаги «The Avalon» аренасида ўтказилиб, у 6 раундга мўлжалланган.
Маълумот учун, Мартин Фидель Риос 27 ёшда ва шу пайтгача 46 та жанг ўтказган. Аргентиналик боксчи шуларнинг 23 тасида ғалаба қозонган бўлиб, 19 бор мағлубиятга учраган. Шунингдек, яна 4 бор дуранг натижа қайд этган. Риос мағлубиятларидан бирини 2017 йилнинг 25 март кунида бошқа бир ўзбекистонлик Азизбек Абдуғофуровдан қабул қилиб олган.
