Jizzax viloyatida gibrid avtomobillar va elektromobillar ishlab chiqaradigan BYD avtomobil zavodi joriy yilning iyun oyida ochilishi rejalashtirilgan. Bu haqda O‘zbekiston Investitsiyalar, sanoat va savdo vazirligi matbuot xizmati Spot’ga ma’lum qildi.
Yanvar oyi oxirida prezident Shavkat Mirziyoyev va BYD prezidenti Van Chuanfu Jizzax viloyatida yiliga 50 ming avtomobil ishlab chiqarish quvvatiga ega elektr va gibrid avtomobillarni yig‘ish loyihasini ishga tushirgan edi. Korxona “Jizzax” erkin iqtisodiy zonasi hududida bo‘ladi.
Mart oyida BYD vakili Ivan Sao “Gazeta.uz”ga ma’lum qilishicha, ishlab chiqarish liniyasini o‘rnatish va sozlash ishlari olib borilmoqda. Rejaga ko‘ra, joriy yilning uchinchi choragida yangi energiya manbalari hisobiga mahalliy ishlab chiqarilgan avtomashinalarni ommaviy yetkazib berish rejalashtirilgan.
Birinchi bosqichda zavodning ishlab chiqarish quvvati 50 ming dona avtomobilga mo‘ljallangan. Uning ta’kidlashicha, ushbu bosqichda uchta avtomobil modelini ishlab chiqarish rejalashtirilgan.
“O‘zavtosanoat” AJ matbuot xizmatining Spot’ga aniqlik kiritishicha, qo‘shma avtomobil zavodi BYD Chazor va BYD Song Plus Dm-1 modellarini mayda tugunli yig‘ish (CKD) yordamida ishlab chiqarishni rejalashtirmoqda.
Bundan tashqari, ishlab chiqarilayotgan elektromobillar soni ortishi bilan mahalliylashtirish darajasi bosqichma-bosqich oshib boradi.
Eslatib o‘tamiz, “O‘zavtosanoat” va Xitoyning BYD Auto kompaniyasi O‘zbekistonda 2022-yil avgust oyida to‘liq siklli avtomobillar ishlab chiqarishni tashkil etish bo‘yicha kelishib olgan edi. Bungacha tomonlar avtomobil bozorini o‘rganishgan.
2022-yil 29-dekabrda “O‘zavtosanoat” (60 foiz ulush) va “BYD Europe B.V.” (Niderlandiya, 40 foiz) qo‘shma korxonasi “BYD Uzbekistan Factory“ni tashkil etdi. 2023-yil 26-sentabrda O‘zbekiston hukumati va investor o‘rtasida loyihani amalga oshirish bo‘yicha kelishuv imzolangan edi. BYD brendi 2023-yil boshidan buyon O‘zbekistonda rasman namoyish etilmoqda.
Avval xabar berganimizdek, BYD O‘zbekiston hukumatidan elektr va gibrid avtomobillarning “tartibsiz” importini cheklashni so‘ragan edi. Bunga xususiy import qilingan modellarning mahalliy iqlim va yo‘l sharoitlariga moslashtirilmagani, shuningdek, rasmiy kafolatga ega emasligi sabab sifatida ko‘rsatilgan.
Prezident Iqtisodiyot va moliya vazirligi, Investitsiyalar, sanoat va savdo vazirligi hamda “O‘zavtosanoat” aksiyadorlik jamiyatiga raqobat to‘g‘risidagi qonunchilik hujjatlari, shuningdek, Jahon savdo tashkiloti tamoyillaridan kelib chiqib 2024-yil 1-iyulga qadar Vazirlar Mahkamasiga BYD brendi ostidagi elektromobil va gibrid avtomobillar importini tartibga solish bo‘yicha investor talabini amalga oshirishga qaratilgan takliflar kiritish topshirig‘ini berdi.
Ma’lumot uchun, 2023-yilda O‘zbekistonga 291 million dollarga 8948 dona BYD avtomobillari olib kirildi.
