O‘zbekistonda kamida 65 nafar bolaning o‘limiga sabab bo‘lgan “Dok-1 Maks” siropi 2021-yilda qayta ro‘yxatdan o‘tkazilayotgan paytda GMP sertifikati bo‘lmasa ham, dorixonalarda sotilgani ma’lum bo‘ldi, deb yozmoqda “Daryo”.
GMP (good manufacturing practice) — dori vositalari ishlab chiqarishni tashkil etish va sifatini nazorat qilish talablarini belgilaydigan amaliyot.
Qayd etilishicha, aynan o‘sha davrda siropning tarkibida zaharli moddasi bo‘lgan 39 600 ta flakoni mamlakatga olib kirilgan.
23-oktabr kuni bo‘lib o‘tgan sud majlisida guvohlik qilganlardan birining sudya savoliga javob berishicha, “Dok-1 Maks” siropi ishlab chiqaruvchisi Marion Biotech PVT. Ltd korxonasi siropni O‘zbekistonda qayta ro‘yxatdan o‘tkazish uchun “Dori vositalari, tibbiy buyumlar va tibbiy texnika ekspertizasi va standartlashtirish davlat markazi” DUKning ro‘yxatdan o‘tkazish bo‘limiga hujjatlarini taqdim etgan.
“Hujjatlardagi GMP sertifikatining muddati tugayotgan bo‘lgan va qayta ro‘yxatdan o‘tkazish davomida salkam ikki oy davomida GMP sertifikatsiz bo‘lgan. Bu paytda esa O‘zbekistondagi dorixonalarda „Dok-1 Maks“ siropi sotilishda davom etgan. Aynan shu muddat ichida Hindistondan O‘zbekistonga 39 600 flakon tarkibida zaharli modda bo‘lgan sirop olib kirilgan”, — deyiladi nashr xabarida.
Shundan so‘ng sudya guvohga hujjatlarda kamchilik bo‘lgan bo‘lsa, nega bunday holat yuzaga kelgani haqida savol bergan. Guvoh esa bu holatga u javobgar emasligini bildirgach, sudya Farmatsevtika tarmog‘ini rivojlantirish agentligi sobiq rahbari S.K.ga yuzlangan.
““Dok-1 Maks”ning 39 600 flakoni ishlab chiqaruvchi Marion Biotech PVT. Ltd korxonasining GMP sertifikati bor paytda ishlab chiqarilgani uchun sertifikati muddati tugagan paytda ham O‘zbekistonga olib kirilishiga hamda dorixonalarda sotilishiga ruxsat berilgan”, — dedi sudlanuvchi S.K.
Ilgari ayblanuvchilardan biri, Dori vositalari, tibbiy buyumlar va tibbiy texnika ekspertizasi va standartlashtirish davlat markazi DUKda ro‘yxatdan o‘tkazish bo‘limi boshlig‘i sifatida ishlagan mas’ul preparat qayta ro‘yxatdan o‘tkazilganda laboratoriya tekshiruvidan o‘tmaganini ma’lum qilgandi. Farmatsevtika agentligining sobiq rahbari S.K.ning aytishicha, sirop qonuniy hujjatlar bilan ro‘yxatdan o‘tganda ham, undagi zaharli moddalarni aniqlab bo‘lmasdi.
O‘sha yig‘ilishda sudlanuvchilardan biri “Dok-1 Maks”ga asal asal ta’mi qo‘shilgan paytda uning guvohnomasi muddati tugagan bo‘lsa, guvohnoma muddatini uzaytirish o‘rniga dori tarkibi o‘zgargani uchun unga yangi guvohnoma qilinishi kerakligi haqida savol bergan.
18-oktabr kuni bo‘lib o‘tgan sud majlisida 2021-yilda O‘zbekistonga olib kelingan asal ta’mli “Dok-1 Maks” siropi tarkibida ham zaharli etilenglikol moddasi bo‘lgani ma’lum qilingandi.
