Ўзбекистонда камида 65 нафар боланинг ўлимига сабаб бўлган «Док-1 Макс» сиропи 2021 йилда қайта рўйхатдан ўтказилаётган пайтда GMP сертификати бўлмаса ҳам, дорихоналарда сотилгани маълум бўлди, деб ёзмоқда «Дарё».
GMP (good manufacturing practice) — дори воситалари ишлаб чиқаришни ташкил этиш ва сифатини назорат қилиш талабларини белгилайдиган амалиёт.
Қайд этилишича, айнан ўша даврда сиропнинг таркибида заҳарли моддаси бўлган 39 600 та флакони мамлакатга олиб кирилган.
23 октябрь куни бўлиб ўтган суд мажлисида гувоҳлик қилганлардан бирининг судья саволига жавоб беришича, «Док-1 Макс» сиропи ишлаб чиқарувчиси Marion Biotech PVT. Ltd корхонаси сиропни Ўзбекистонда қайта рўйхатдан ўтказиш учун «Дори воситалари, тиббий буюмлар ва тиббий техника экспертизаси ва стандартлаштириш давлат маркази» ДУКнинг рўйхатдан ўтказиш бўлимига ҳужжатларини тақдим этган.
«Ҳужжатлардаги GMP сертификатининг муддати тугаётган бўлган ва қайта рўйхатдан ўтказиш давомида салкам икки ой давомида GMP сертификатсиз бўлган. Бу пайтда эса Ўзбекистондаги дорихоналарда „Док-1 Макс“ сиропи сотилишда давом этган. Айнан шу муддат ичида Ҳиндистондан Ўзбекистонга 39 600 флакон таркибида заҳарли модда бўлган сироп олиб кирилган», — дейилади нашр хабарида.
Шундан сўнг судья гувоҳга ҳужжатларда камчилик бўлган бўлса, нега бундай ҳолат юзага келгани ҳақида савол берган. Гувоҳ эса бу ҳолатга у жавобгар эмаслигини билдиргач, судья Фармацевтика тармоғини ривожлантириш агентлиги собиқ раҳбари С.К.га юзланган.
««Док-1 Макс»нинг 39 600 флакони ишлаб чиқарувчи Marion Biotech PVT. Ltd корхонасининг GMP сертификати бор пайтда ишлаб чиқарилгани учун сертификати муддати тугаган пайтда ҳам Ўзбекистонга олиб кирилишига ҳамда дорихоналарда сотилишига рухсат берилган», — деди судланувчи С.К.
Илгари айбланувчилардан бири, Дори воситалари, тиббий буюмлар ва тиббий техника экспертизаси ва стандартлаштириш давлат маркази ДУКда рўйхатдан ўтказиш бўлими бошлиғи сифатида ишлаган масъул препарат қайта рўйхатдан ўтказилганда лаборатория текширувидан ўтмаганини маълум қилганди. Фармацевтика агентлигининг собиқ раҳбари С.К.нинг айтишича, сироп қонуний ҳужжатлар билан рўйхатдан ўтганда ҳам, ундаги заҳарли моддаларни аниқлаб бўлмасди.
Ўша йиғилишда судланувчилардан бири «Док-1 Макс»га асал асал таъми қўшилган пайтда унинг гувоҳномаси муддати тугаган бўлса, гувоҳнома муддатини узайтириш ўрнига дори таркиби ўзгаргани учун унга янги гувоҳнома қилиниши кераклиги ҳақида савол берган.
18 октябрь куни бўлиб ўтган суд мажлисида 2021 йилда Ўзбекистонга олиб келинган асал таъмли «Док-1 Макс» сиропи таркибида ҳам заҳарли этиленгликоль моддаси бўлгани маълум қилинганди.
