2021-yilda O‘zbekistonga olib kelingan, asal ta’mli “Dok-1 Maks” siropi tarkibida ham zaharli moddalar bo‘lgan. Bu haqda 18-oktabr kuni kamida 65 nafar bolaning o‘limiga sabab bo‘lgan Marion Biotech preparatlari bo‘yicha sud majlisida ayblanuvchilar ma’lum qildi, deb yozadi “Daryo”.
Sud jarayonida so‘zga chiqqanlarga ko‘ra, 2021-yil oktabr oyida ishlab chiqaruvchilar asal va limon ta’miga ega “Dok-1 Maks” siropini qayta ro‘yxatdan o‘tkazish uchun ariza bergan.
Laboratoriya tekshiruvi uchun taqdim etilgan 33 flakon sirop orasida 2020-yilda chiqarilgan limon ta’mli preparatlarda zaharli moddalar yo‘qligi, 2021-yilda chiqarilgan “Dok-1 Maks” asal ta’mli partiyasida esa etilenglikol zaharli moddasi aniqlangan. U avtomobillar uchun antifriz, yuvish vositalari, bo‘yoqlar va boshqa mahsulotlarda qo‘llanadi.
Ilgari e’lon qilingan sinov natijalari “Dok-1 Maks” tarkibidagi etilenglikol darajasi me’yordan 300 baravar yuqori ekanini ko‘rsatgan. Buning o‘rniga uning tarkibida propilenglikol (bakteritsid ta’sirga ega oziq-ovqat qo‘shimchasi) bo‘lishi kerak edi.
Ma’lum qilinishicha, O‘zbekistonga asal ta’mli siroplar olib kelingan bo‘lsa-da, “sotuvga chiqishga ulgurmagan”.
Sudya Musa Yusupov sud majlislarining birida 2022-yilda O‘zbekistonga hindistonlik ishlab chiqaruvchilar tomonidan ishlab chiqarilgan 256 ming flakon “Dok-1 Maks” siropi kelganini ta’kidladi, deb yozadi “Daryo”.
Ilgari ayblanuvchilardan biri, Dori vositalari, tibbiy buyumlar va tibbiy texnika ekspertizasi va standartlashtirish davlat markazi DUKda ro‘yxatdan o‘tkazish bo‘limi boshlig‘i sifatida ishlagan mas’ul preparat qayta ro‘yxatdan o‘tkazilganda laboratoriya tekshiruvidan o‘tmaganini ma’lum qilgandi. Farmatsevtika agentligining sobiq rahbari S.K.ning aytishicha, sirop qonuniy hujjatlar bilan ro‘yxatdan o‘tganda ham, undagi zaharli moddalarni aniqlab bo‘lmasdi.
O‘sha yig‘ilishda sudlanuvchilardan biri “Dok-1 Maks”ga asal asal ta’mi qo‘shilgan paytda uning guvohnomasi muddati tugagan bo‘lsa, guvohnoma muddatini uzaytirish o‘rniga dori tarkibi o‘zgargani uchun unga yangi guvohnoma qilinishi kerakligi haqida savol bergan. Bunga javoban, Farmatsevtika agentligi direktorining sobiq o‘rinbosari N.M. “preparatning molekulasi o‘zgarmaganini” ta’kidlagan. Ayblanuvchi “etilenglikol qo‘shilganda dori molekulasi o‘zgargan” deya ta’kidlagan. N.M. esa dori ishlab chiqaruvchilari etilenglikol qo‘shilishi haqida hech qanday ma’lumot berilmaganini bildirgan.
