“Gazeta.uz” o‘rgangan Xitoy Xalq Respublikasi bojxona bosh boshqarmasi ma’lumotlariga ko‘ra, avgust oyida O‘zbekiston Xitoyga 75,27 million dollarga tabiiy gaz eksport qilgan.
Avval xabar berganimizdek, aprel oyida O‘zbekiston “zangori olov” eksportini qayta tiklagan bo‘lib, o‘sha oyda 40,47 million dollarni tashkil etdi. May oyida eksport 78,16 million dollarga, iyun oyida esa 85,27 million dollarga, iyulda esa 91,39 million dollarga oshgan.
Yil boshidan buyon jami gaz eksporti 370,57 million dollarni tashkil etdi, bu o‘tgan yilning shu davriga (618,16 million dollar) nisbatan 1,6 baravar kam. Buni yanvar-mart oylarida O‘zbekistondagi energetika inqirozi sharoitida gaz eksporti to‘xtatilgani bilan izohlash mumkin.
Bir oylik ko‘rsatkichlarni solishtiradigan bo‘lsak, 2022-yil avgust oyida 112,28 million dollarlik gaz yetkazib berilgan.
Statistika agentligi ma’lumotlariga ko‘ra, O‘zbekiston sakkiz oy ichida 377,9 million dollarlik gaz eksport qilgan, bu o‘tgan yilning shu davriga nisbatan 42,1 foizga kamdir.
Sakkiz oy davomida Rossiya 7,96 milliard dollarlik gaz eksport qilib, Xitoyga gaz yetkazib berish bo‘yicha yetakchi bo‘ldi (2022-yilning yanvar-avgust oylariga nisbatan 38,5 foizga ko‘p), Turkmaniston ikkinchi o‘rinda — 6,63 milliard dollar (+5 foiz), keyingi o‘rinlarda Indoneziya — 1,7 mlrd dollar (-17,8%), Myanma — 993,9 mln dollar (+16,2%), Qozog‘iston — 789,7 mln dollar (-2,1%).
“Gazeta.uz” avvalroq O‘zbekiston va Xitoy tomonidan taqdim etilgan gaz eksporti bo‘yicha ma’lumotlar bir necha bor farq qilishini yozgan edi. Bunga javoban O‘zbekiston energetika vaziri Jo‘rabek Mirzamahmudov, Xitoy statistikasida O‘zbekiston orqali Turkmaniston gazi tranziti xizmatlari ham o‘z ichiga olganini ma’lum qildi. “Gazeta.uz” ma’lumotlarni taqqosladi va tranzit hajmini hisobga olinganda ham katta farq borligini aniqladi.
Shuningdek, Iqtisodiyot va Moliya vazirligi birinchi yarim yillikda O‘zbekistonga 2,6 milliard kub metr gaz import qilingani haqida xabar berganiga e’tibor qaratdik, bu 2022-yilning olti oyidagiga nisbatan 7,2 barobar ko‘p. Bu Statistika agentligi ma’lumotlaridan farq qiladi va Markaziy bank rahbarining gaz importi tufayli budjet taqchilligi oshgani haqidagi so‘zlarini qisman tushuntirishi mumkin.
