O‘zbekistonning UzGasTrade va Turkmanistonning “Turkmangaz” kompaniyasi o‘rtasida yiliga 2 milliard kub metrgacha turkman gazini yetkazib berish bo‘yicha qisqa muddatli shartnoma imzolandi. Bu haqda O‘zbekiston Energetika vazirligi rahbari Jo‘rabek Mirzamahmudov Turkmaniston davlat axborot portaliga bergan intervyusida ma’lum qildi.
Bunday kelishuvga Ashxobodda O‘zbekiston energetika vaziri Jo‘rabek Mirzamahmudov va Turkmaniston bosh vazirining yonilg‘i-energetika kompleksi uchun mas’ul o‘rinbosari Botir Amanov o‘rtasidagi muzokaralar chog‘ida erishildi.
“Bu faqat boshlanishi, chunki biz o‘zaro manfaatli hamkorlikni kengaytirishning yanada keng istiqbollarini muhokama qildik. Bu uzoq muddatga va yetkazib berishni ko‘paytirish bilan uzoq muddatli shartnoma ishlab chiqishni o‘z ichiga oladi”, — dedi Jo‘rabek Mirzamahmudov.
Shuningdek, u tomonlar elektr energiyasini yetkazib berish, elektr energiyasini uchinchi davlatlarga tranzit qilish, shuningdek, neft, neft mahsulotlari, kimyo sanoati mahsulotlarini, xususan, fosfat va azotli o‘g‘itlar va boshqalarni yetkazib berish sohasida hamkorlik qilish masalalarini ko‘rib chiqqanini aytdi.
Eslatib o‘tamiz, dekabr oyida O‘zbekiston Turkmaniston bilan birinchi marta gaz yetkazib berish bo‘yicha to‘g‘ridan-to‘g‘ri, uchinchi tomon ishtirokisiz qisqa muddatli shartnoma tuzgandi. Qish mavsumida taqchillikni qoplash uchun uch oy ichida 1,5 milliard kub metrga yaqin gaz importi rejalashtirilgan.
