Rossiyalik xonanda Grigoriy Lepsning Qirg‘izistonning Issiqko‘l viloyati Cholpon-Ata shahrida 2-avgust kuni o‘tkazilishi rejalashtirilgan konserti bekor qilindi. Bu haqda san’atkorning konsertini o‘tkazishni rejalashtirgan Blonder Pub bari ma’lum qildi.
Tashkilotchilar konsert nima sababdan bo‘lib o‘tmasligiga izoh bermagan. “Ozodlik”ning tadbir tashkilotchilariga tayanib xabar berishicha, konsert jamoatchilik noroziligi tufayli bekor qilingan.
Konsert e’lon qilinganidan so‘ng Qirg‘izistondagi ko‘plab ijtimoiy tarmoq foydalanuvchilari Rossiyaning Ukrainaga harbiy bosqinini qo‘llab-quvvatlovchi san’atkorning kelishiga qarshi chiqishdi. 3-iyul kuni xonanda urush harakatlari hududida “Leopard” tankini shikastlagan askarga 1 million rubl to‘laganini ma’lum qildi.
Iyun oyida Qozog‘istonda Grigoriy Lepsning konserti ham jamoatchilik noroziligi tufayli bekor qilingan edi.
Uning Toshkentdagi konserti 23-oktabrga belgilangan. Avvalroq O‘zbekistondagi bir guruh faollar nutqni bekor qilishni talab qilgani haqida yozgan edik.
O‘zbekiston madaniyat va turizm vaziri o‘rinbosari Bahodir Ahmedov esa O‘zbekistonda san’at uchun hech qanday to‘siq yo‘qligini aytdi. Mamlakatga taklif etilgan san’atkorlar haqida “Kelyapti, san’atini namoyish qilyapti, ketyapti”, — dedi.
Ukrainaning Toshkentdagi elchixonasi vazir o‘rinbosarining intervyusiga javoban, bunday gastrollarni qo‘llab-quvvatlash O‘zbekiston imijiga tahdid ekanini ta’kidlab, qarshi chiqqan faollarga minnatdorlik bildirdi.
