Россиялик хонанда Григорий Лепснинг Қирғизистоннинг Иссиқкўл вилояти Чолпон-Ата шаҳрида 2 август куни ўтказилиши режалаштирилган концерти бекор қилинди. Бу ҳақда санъаткорнинг концертини ўтказишни режалаштирган Blonder Pub бари маълум қилди.
Ташкилотчилар концерт нима сабабдан бўлиб ўтмаслигига изоҳ бермаган. «Озодлик»нинг тадбир ташкилотчиларига таяниб хабар беришича, концерт жамоатчилик норозилиги туфайли бекор қилинган.
Концерт эълон қилинганидан сўнг Қирғизистондаги кўплаб ижтимоий тармоқ фойдаланувчилари Россиянинг Украинага ҳарбий босқинини қўллаб-қувватловчи санъаткорнинг келишига қарши чиқишди. 3 июль куни хонанда уруш ҳаракатлари ҳудудида «Леопард» танкини шикастлаган аскарга 1 миллион рубль тўлаганини маълум қилди.
Июнь ойида Қозоғистонда Григорий Лепснинг концерти ҳам жамоатчилик норозилиги туфайли бекор қилинган эди.
Унинг Тошкентдаги концерти 23 октябрга белгиланган. Аввалроқ Ўзбекистондаги бир гуруҳ фаоллар нутқни бекор қилишни талаб қилгани ҳақида ёзган эдик.
Ўзбекистон маданият ва туризм вазири ўринбосари Баҳодир Аҳмедов эса Ўзбекистонда санъат учун ҳеч қандай тўсиқ йўқлигини айтди. Мамлакатга таклиф этилган санъаткорлар ҳақида «Келяпти, санъатини намойиш қиляпти, кетяпти», — деди.
Украинанинг Тошкентдаги элчихонаси вазир ўринбосарининг интервьюсига жавобан, бундай гастролларни қўллаб-қувватлаш Ўзбекистон имижига таҳдид эканини таъкидлаб, қарши чиққан фаолларга миннатдорлик билдирди.
