Маданият ва туризм вазири ўринбосари Баҳодир Аҳмедов Kun.uz нашри мухбирига берган интервьюсида «уруш борасида нейтрал позицияда эканини билдирган Ўзбекистон ҳукумати нега Z-артистларнинг Тошкентдаги концерти масаласида нейтраллик кўрсатмаётгани» ҳақидаги саволга изоҳ берди.
«Ҳамма нарсага чегара тутиш мумкин, лекин санъат чегарасиз соҳа. Ҳозир [бизга] театр, эстрада йўналиши бўйича хонандалар келяпти. Бунинг қайсидир давлатларнинг бир-бирига бўлган муносабатига ҳеч қандай боғлиқлиги йўқ. Бу — санъат. Бунда тушган маблағларнинг урушга йўналтирилиши бўйича, очиқ айтиш керак, кўп гаплар бўляпти. Менимча, бу гаплар ҳақиқатдан йироқ. Концертлар масаласига келсак, биз қайси давлатдан келадиган санъаткор бўлса, у яхши мақсадда келса, халққа хизмат қиламан, санъатнинг кучини кўрсатаман, деса, ҳақиқий санъаткор бўлса, Ўзбекистон ҳеч қайси санъаткорга эшигини ёпиб, тамбалаб ташлагани йўқ», — деди вазир ўринбосари.
Унинг сўзларига кўра, Ўзбекистонда санъатга ҳеч қандай тўсиқ йўқ.
«Мана, келяпти, санъатини намойиш қиляпти, олқишини оляпти, кетяпти. Ўзбекистонда санъатга ҳеч қандай тўсиқ йўқ. Худога шукур, тинч юртда яшаяпмиз. Мана, туркий давлатларнинг ТУРКСОЙ ташкилотидан қанча туркий миллатга мансуб бўлган санъаткорлар ташриф буюрди. Ҳаммаси концертини қўйди ва халқ олқишига эга бўляпти. Мана, кўргазмаларини ўтказишяпти. Яхши мақсадда келган инсон бўлса, Ўзбекистон — тинч юрт. Халқимиз — санъатсевар халқ. Ғийбат, фисқу фасод, пулни қаергадир ишлаётган экан, деган гаплардан йироқ бўлиш керак. Бу гапларни гапираётганлар шу гапларни қўзғашга интилаётган инсонлар», — дея таъкидлади Баҳодир Аҳмедов.
Вазир ўринбосари Россиянинг Украинага босқинини оқловчи санъаткорларнинг концертлари Қозоғистонда бекор қилинаётгани борасида ҳам муносабат билдирган.
«Бу — ён қўшниларнинг ўз сиёсати, ўз дунёси. Улар ўзи учун жавоб берсин, биз ўзимиз учун жавоб берамиз. Бир нарсани очиқ айтиш керак: бунақа ғийбат, фисқу фасод гаплардан йироқ бўлишимиз керак. Биз, Худога шукур, тинч жойда яшаяпмиз. Мана, санъатга бўлган эътибор. Концертга тушаркан, унинг пулини урушга ишлатаркан, деган гаплар нега керак? Урушнинг куни шу концертнинг пулига қолибдими? Қўйсин, тинчлик билан қўйсин, тинчлик билан юрсин. Қачонгача ғийбат, фисқу фасод гаплар? Ҳа деса, рухсат берадиган бўлса, урушга тақайди. Тақаш керак эмас. Фақат яхши, олий ниятлар билан ҳаракат қилиш керак», — деган маданият ва туризм вазири ўринбосари.
Баҳодир Аҳмедовнинг қайд этишича, ҳамма нарсанинг ёмон тарафини эмас, балки яхши тарафини ўйлаш лозим. «Шу санъаткор шу ерга ўз санъатини намойиш қилиш учун келибди, деган кўз билан қараш керак», — дея қўшимча қилган у.
«Иккинчи, учинчи ўринда турадиган фисқу фасоддан йироқроқ, устунроқ бўлишимиз керак. Шунда мақсадимизга эришамиз. Биз бир нарса учун курашишимиз керак: ёшларимиз санъатга чанқоқ, шуни қўллаб-қувватлашимиз лозим. Бизнинг сиёсатимиз — шу. Давлат раҳбарининг сиёсати ҳаммаси. Қаранг, Озарбайжонда бўлган муғом фестивалида гран-прини ким олди? Ўзбекнинг қоракўзи олди. Шахматда ким оляпти? Ўзбек қоракўзлари, Ўзбекистон фарзандлари оляпти. Биз фақат шулар ҳақида ўйлашимиз керак», — деган Баҳодир Аҳмедов.
Маълумот учун, Россиянинг Украинага босқинини очиқ тарзда қўллаб-қувватлаб, фаол тарғиб қилаётган россиялик хонандалардан бири Григорий Лепснинг 2023 йил 23 октбярь куни пойтахтдаги Халқлар дўстлиги санъат саройида концерт тақдим қилиши режалаштирилган. Унинг мазкур дастурига ўзбекистонлик бир гуруҳ фаоллар тармоқларда #LepsKerakmas хештэги билан ушбу концертни бекор қилишни талаб қилиб, бойкот эълон қилди.
Манба: Mirzo Zominiy / Telegram.
Аммо айни пайтда ушбу концерт учун чипталар iTicket.uz сайтида сотилишда давом этмоқда.
Эслатиб ўтамиз, россиялик қўшиқчилар Григорий Лепс ва Николай Басков Украинадаги уруш зонасида Leopard ва Abrams танкларини йўқ қилган ҳар бир кишига 1 миллион рублдан тўлашга ваъда берганди.
3 июль куни эса Григорий Лепс ўзининг Telegram каналида берган ваъдасида тургани ва Leopard танкини йўқ қилгани айтилаётган россиялик аскарга 1 миллион рубль тўлаганини маълум қилди.
Маълумот учун, қозоғистонлик фаолларнинг концертга нисбатан қаршилиги туфайли Лепснинг Олмаотадаги Қўнаев шаҳрида 8 июль куни ўтиши режалаштирилган концерти бир муддат аввал бекор қилинганди.
2023 йил 20−21 май кунлари Тошкентда бўлиб ўтиши керак бўлган «Жара» халқаро мусиқа фестивали қолдирилган эди. Мазкур фестиваль ўзбекистонлик тармоқ фойдаланувчиларининг эътирозига сабаб бўлган. Хусусан, 29 март куни блогер Мирзаёр Эркинов «Кремль томонидан қўллаб-қувватланган ва Кремлни қўллаб-қувватловчи Z-артистлар» иштироки туфайли тадбирни бойкот қилишга чақирган. Фестиваль «дунёдаги ҳозирги вазият кенг кўламли мусиқий тадбирларни ўтказиш учун қулай эмас»лиги сабабли қолдирилган.
Аввалроқ Боку ва Олмаота шаҳарларида ҳам «Жара» фестивали бекор қилинган. Қозоғистонда ҳам ижтимоий тармоқ фойдаланувчилари фестивални бекор қилишни талаб қилиб, бойкот эълон қилганди. Олмаотада бекор қилингандан сўнг фестиваль Тошкентга кўчирилган. Унда HammAli & Navai, EMIN, Ани Лорак, Ольга Бузова, Dabro, Дискотека Авария, Жасмин, Artik&Asti, KARNA.VAL, Ваня Дмитриенко, Vlade Kay, Mary Gu, Bahh Tee & Turken, Cosmos girls, Нюша ва бошқаларнинг иштироки кутилаётган бўлган.
