BMT Taraqqiyot dasturining O‘zbekistondagi faoliyatining 30 yilligiga bag‘ishlangan tadbir bo‘lib o‘tdi. “Gazeta.uz” muxbirining xabar berishicha, poytaxtdagi Yoshlar ijod saroyida o‘tkazilgan yubiley tadbirida xalqaro tashkilotlarning mamlakatdagi vakillari, O‘zbekistondagi davlat va nodavlat notijorat tashkilotlar rahbariyatlari, jamoatchilik faollari va jurnalistlar ishtirok etdi.
Foto: BMTTD
O‘zbekistonga ilk rasmiy tashrif bilan kelgan BMT Taraqqiyot dasturining Yevropa va MDH davlatlari uchun mintaqaviy byurosi direktori Ivana Jivkovich tadbirning ochilish nutqini so‘zladi.
Uning aytishicha, BMTTD 1993-yilda O‘zbekistonda tashkil etilganidan buyon mamlakat hukumati va xalqi bilan yaqin hamkorlik qilib, barcha uchun adolat va farovonlikni qamrab oluvchi barqaror rivojlanish haqidagi umumiy tasavvurni amalga oshirishga harakat qilmoqda.
Ivana Jivkovich. Foto: BMTTD
“Oxirgi o‘ttiz yil davomida O‘zbekiston barqaror va diversifikatsiyalangan iqtisodiyotni barpo etish, ta’lim sifatini yaxshilash, qashshoqlikni kamaytirish, gender tengligini oshirish va demokratik boshqaruvni mustahkamlash borasida ulkan yutuqlarga erishdi. Biz O‘zbekiston hukumati va xalqi bilan birgalikda mamlakatning tabiiy boyliklarini, jumladan, suv, yer va o‘rmonlarni muhofaza qilish borasida amalga oshirgan ishlarimizdan faxrlanamiz. Ushbu ajoyib yutuqlarni nishonlashda sizga qo‘shilamiz”, — dedi Ivana Jivkovich.
Foto: BMTTD
U bugungi kunning dolzarb muammolarini hal qilish uchun jamoaviy harakatlar zarurligini anglash kerakligini qayd etdi.
“COVID-19 biz hammamiz global zarbalarga qarshi himoyasiz ekanimizni va faqat jamoaviy harakatlar orqali yaxshiroq, yashil va inklyuziv jamiyatlarni barpo etishimiz mumkinligini aniq ko‘rsatdi. Shuning uchun BMTTD O‘zbekistonning barqaror kelajak qurish borasidagi sa’y-harakatlarini qo‘llab-quvvatlashga sodiq qoladi. Hamkorlarimiz bilan birgalikda iqlim o‘zgarishi, bioxilma-xillik, boshqaruv va inklyuziv inson taraqqiyotiga alohida e’tibor qaratgan holda barqaror rivojlanish maqsadlariga erishish yo‘lida ishlashda davom etamiz”, — dedi u.
Foto: BMTTD
Byuro direktorining aytishicha, global maqsadlarga tayangan holda BMTTD va BMT oilasi O‘zbekiston bilan birgalikda barcha uchun yanada yashil, inklyuziv va barqaror kelajakni yaratish yo‘lida hamkorlik qilishni intiqlik bilan kutmoqda. “Bu — 30 yillik yubileyda juda ham munosib majburiyat. Biz O‘zbekiston bilan hamkorligimizni davom ettirib, barqarorlik, tenglik va inson farovonligini oshirishga intilamiz”, — dedi u.
Tadbirda BMTTDning hukumat bilan samarali hamkorligi aks etgan 90 soniyali video namoyish etildi. Shundan so‘ng “Shamsi-Qamar” teatr jamoasining tabiat haqidagi qisqa sahna ko‘rinishi qatnashchilarga havola qilindi.
Foto: BMTTD
Yubiley kechasida BMTTDning O‘zbekistondagi benefitsiarlari ham so‘zga chiqib, o‘z loyihalari va tashkilot haqida gapirdi.
Foto: BMTTD
BMT Taraqqiyot dasturining O‘zbekistondagi doimiy vakili Matilda Dimovska tadbirning yopilish nutqini so‘zladi. U odamlar va sayyoralar o‘rtasidagi muvozanat nuqtai nazariga mos keladigan adolatli va barqaror kelajakni yaratishda BMTTDga ishonch bergani uchun O‘zbekiston rahbariyatiga minnatdorlik bildirdi.
Matilda Dimovska. Foto: BMTTD
“Birgalikda ishlash orqali odamlarning yaxshiroq hayot qurishi uchun tanlovlarini kengaytirishni maqsad qilganmiz. Bu muvaffaqiyatimizning yakuniy o‘lchovidir. BMTTDning faoliyati aholiga qaratilgan. Shu sababli O‘zbekiston xalqiga bag‘ishlangan 30 yillik birgalikdagi sa’y-harakatlarimizni aks ettiruvchi ushbu fotoko‘rgazmani tashkil qildik. Hamkorligimiz bardavom bo‘lsin”, — dedi Matilda Dimovska.
