O‘zbekiston Oliy sudi Jinoyat ishlari bo‘yicha sudlov hay’ati 12-iyun, dushanba kuni Qoraqalpog‘istonda 2022-yil iyul oyi boshidagi voqealar yuzasidan qo‘zg‘atilgan jinoyat ishi bo‘yicha yana 28 nafar sudlangan shaxslarning shikoyatlarini ko‘rib chiqish yakunlari bo‘yicha qarorni e’lon qildi. “Gazeta.uz” sud majlisini jonli efirda namoyish etdi.
Eslatib o‘tamiz, 17-mart kuni Jinoyat ishlari bo‘yicha Qoraqalpog‘iston sudi sudyalar hay’ati sudyasi Dauletbay Razov raisligida birinchi instansiya sudi Nukus voqealari bo‘yicha ikkinchi sud majlisida 39 nafar sudlanuvchiga nisbatan hukm e’lon qilingandi. Unga ko‘ra, 28 kishiga 5 yildan 11 yilgacha qamoq jazosi tayinlandi. 11 nafar ayblanuvchi esa shartli ravishda sud zalidan ozod qilindi.
Apellyatsiya instansiyasi sudining hal qiluv qarori bilan (ish Oliy sud sudyasi A.Abdikarimov va sudyalar U.Ro‘ziyev va D.Tojiboyevlar raisligida ko‘rib chiqildi) 5 nafar sudlanuvchiga nisbatan ozodlikdan mahrum qilish jazosidan ozodlikni cheklash jazosiga almashtirildi. 16 nafar sudlanuvchiga nisbatan jazo muddati qisqartirildi, 7 nafar sudlanuvchining jazosi esa o‘zgarishsiz qoldirildi.
Jazosi erkinlikni cheklash bilan almashtirilganlar
- Islom Po‘latov — 5 yil ozodlikdan mahrum qilish o‘rniga — 5 yil ozodlikni cheklash;
- Polat Yesengeldiyev va Islombek Aytmuratov — 6 yil qamoq o‘rniga — 5 yil ozodlikni cheklash;
- Islom Saparov va Rahimjon Jumaboyev — 7 yil qamoq o‘rniga — 5 yil ozodlikni cheklash.
Ular sud zalida ozod qilindi.
Murojaatlari qisman qanoatlantirilganlar
- Dauletkeldi Nadirboyev va Aidos Yesemuratovga — 7 yildan ozodlikdan mahrum qilish muddatini 5 yilga qisqartirish;
- Zairbek Pirjanov, Kuanishbay Baxiyev va Ruslan Baimbetov — 7 yildan 6 yilgacha ozodlikdan mahrum qilish;
- Rustam Do‘simbetov va Azamat Allanazarov — 7 yildan 6 yilgacha ozodlikdan mahrum qilish;
- Nusret Bauetdinov — 7,5 yildan 5,5 yilgacha ozodlikdan mahrum qilish;
- Zamirbek Tojimuratov va Asilbek Omirzoqov — 8 yildan 7 yilgacha ozodlikdan mahrum qilish;
- Kamol Eshjonov, Nursulton Baylepesov va Alpamis Jumabekov — 6 yildan 5 yilgacha ozodlikdan mahrum qilish;
- Adilbek Sariyev va Qo‘ng‘ratbay Bekpo‘latov — 7 yildan 6 yilgacha ozodlikdan mahrum qilish;
- Nursulton Duysenboyev — 7,5 yildan 5 yilgacha qamoq.
Apellyatsiya shikoyatlari qanoatlantirilmaganlar
Birinchi instansiya sudining Kuanishbay Begaliyev, Nuratdiyin Xabipov, Dauranbek Ramanov, Sharapat Ashirbekov, Omirbek Qurbonov, Manas Rahmanov va O‘ralbay Do‘snazarovga nisbatan hukmi o‘zgarishsiz qoldirildi.
Sud ajrimi bilan jinoyat ishi bo‘yicha yetkazilgan zararni qoplash maqsadida olib qo‘yilgan mol-mulk, shu jumladan ko‘chmas mulk va avtomashinalar quyidagi sudlanuvchilarga qaytariladi: D.Nadirboyev, Q.Baxiyev, N.Bauetdinov, A.Jumabekov, P.Yesengeldiyev, R.Dosymbetov, O.Dosnazarov, R.Jumaboyev va Z.Tojimuratov.
Birinchi instansiya sudi hukmining qolgan qismlari o‘zgarishsiz qoldirildi.
Eslatib o‘tamiz, 5-iyun kuni apellyatsiya sudi xuddi shu jinoyat ishi bo‘yicha birinchi sud majlisida hukm qilingan shaxslarning shikoyatlari bo‘yicha ajrim e’lon qilgandi. Sud qarori bilan 8 nafar ayblanuvchiga nisbatan qamoq jazosi ozodlikni cheklash bilan almashtirildi, 6 nafar sudlanuvchining jazo muddati qisqartirildi, ishda asosiy ishtirok etgan Dauletmurat Tajimuratovga nisbatan — 16 yil qamoq jazosi o‘zgarishsiz qoldirildi. Sud prokuraturaning 4 kishiga nisbatan protestini rad etdi. Marhum Polat Shamshetovga nisbatan sud hukmning hukmga tegishli qismini bekor qilishga qaror qildi.
