Rossiyaning «Pobeda» aviakompaniyasi 21 apreldan Moskva va Toshkentni to‘g‘ridan-to‘g‘ri charter reyslar bilan bog‘lashni rejalashtirmoqda, deb xabar qildi Uzbekistan Airports matbuot xizmati.
Bundan tashqari, Moskva — Samarqand — Moskva yo‘nalishi bo‘yicha haftasiga ikki marta — payshanba va yakshanba kunlari qatnovni amalga oshirish rejalashtirilgan.
Bu haqda aviatashuvchi vakillari Uzbekistan Airports bilan muzokaralar chog‘ida ma’lum qildi. Muloqot chog‘ida davomida Rossiya shaharlaridan Toshkent, Samarqand, Buxoro va O‘zbekistonning boshqa shaharlariga muntazam yo‘lovchi qatnovlarini tashkil etish masalalari muhokama qilindi.
«Pobeda» — Rossiyaning loukoster aviakompaniyasi bo‘lib, shtab-kvartirasi Vnukovo (Moskva) aeroportida joylashgan.
Avvalroq «Aeroflot» kompaniyasi Sankt-Peterburgdan Toshkent va Samarqandga muntazam reyslarni yo‘lga qo‘yishi haqida xabar berilgan edi. Parvozlar Boeing 738 samolyotlarida haftasiga uch marta — chorshanba, juma va yakshanba kunlari amalga oshiriladi.
