Россиянинг «Победа» авиакомпанияси 21 апрелдан Москва ва Тошкентни тўғридан-тўғри чартер рейслар билан боғлашни режалаштирмоқда, деб хабар қилди Uzbekistan Airports матбуот хизмати.
Бундан ташқари, Москва — Самарқанд — Москва йўналиши бўйича ҳафтасига икки марта — пайшанба ва якшанба кунлари қатновни амалга ошириш режалаштирилган.
Бу ҳақда авиаташувчи вакиллари Uzbekistan Airports билан музокаралар чоғида маълум қилди. Мулоқот чоғида давомида Россия шаҳарларидан Тошкент, Самарқанд, Бухоро ва Ўзбекистоннинг бошқа шаҳарларига мунтазам йўловчи қатновларини ташкил этиш масалалари муҳокама қилинди.
«Победа» — Россиянинг лоукостер авиакомпанияси бўлиб, штаб-квартираси Внуково (Москва) аэропортида жойлашган.
Аввалроқ «Аэрофлот» компанияси Санкт-Петербургдан Тошкент ва Самарқандга мунтазам рейсларни йўлга қўйиши ҳақида хабар берилган эди. Парвозлар Boeing 738 самолётларида ҳафтасига уч марта — чоршанба, жума ва якшанба кунлари амалга оширилади.
