Human.uz sayti direktori Xurshid Daliyev va boshqa shaxslarga nisbatan jinoyat ishi qo‘zg‘atildi. Bu haqda O‘zbekiston Davlat xavfsizlik xizmati matbuot xizmati xabar berdi.
DXX ma’lumotiga ko‘ra, fuqaro I.A.dan kelib tushgan murojaatga asosan O‘zbekiston Jinoyat kodeksining 165-moddasi 2-qismi «v» bandi (tovlamachilik bir guruh shaxslar tomonidan oldindan til biriktirib sodir etilgan bo‘lsa, besh yildan o‘n yilgacha ozodlikdan mahrum qilish bilan jazolanadi) bilan jinoyat ishi qo‘zg‘atilgan va hozirda dastlabki tergov harakatlari olib borilmoqda.
Xurshid Daliyev va boshqalarning Telegram messenjeridagi Kompromat.uzb va boshqa kanallar orqali amalga oshirilgan jinoyatlarga aloqadorlikda gumon qilinmoqda.
Tergov davomida protsess ishtirokchilari advokat bilan ta’minlangan, deyiladi xabarda.
DXX tergov jarayonlarini olib borishda ularning qonun bilan belgilangan huquq va erkinliklari ta’minlanishi kafolatlanishi, ushbu jarayon bilan bog‘liq ma’lumotlar doimiy ravishda e’lon qilinib borilishini ma’lum qildi.
