O‘zbekiston Sog‘liqni saqlash vazirligi dorixonalarga Quramax distribyutor-kompaniyasi tomonidan 2022 yildan olib kiriladigan barcha dori vositalarining mamlakatga sotilishini to‘xtatishni buyurdi. Yangi sog‘liqni saqlash vaziri Amrillo Inoyatovning 2 yanvardagi maktubida bu haqda so‘z boradi, deb xabar berdi «Gazeta.uz» muxbiri.
«Dori vositalari sifatini nazorat qilish va standartlashtirish laboratoriyasi tomonidan „Dok-1 Maks“ hamda „Ambronal“ dori vositalarining chququrlashtirilgan sifat nazorati o‘tkazish natijalariga ko‘ra, normativ hujjatda ko‘rsatilgan tarkibga nomuvofiqlik aniqlangan. Mazkur dori vositalarining ayrim seriyalarida propilenglikol moddasi o‘rniga yoki u bilan birga etilenglikol va dietilenglikol moddalari mavjudligi aniqlandi», — deyiladi ko‘rsatma xatida.
Bundan tashqari, 29 dekabr kuni Toshkent shahar sudiga ushbu dori vositalarini ro‘yxatga olish guvohnomalarini bekor qilish to‘g‘risida da’vo arizasi kiritildi. Dori vositalari va tibbiy buyumlar davlat reyestriga ko‘ra, «Dok-1 Maks» siropi 2017 yil 2 fevralda, so‘ngra 2022 yil 29 martda, tabletkasi esa 2017 yil 5 dekabrda ro‘yxatga olingan. Ambronol — 2007 yil 11 dekabr va 2018 yil 15 yanvarda.
Bu dori vositalari savdosini to‘xtatib turish haqidagi birinchi e’lon emas. 22 dekabr kuni Sog‘liqni saqlash vazirligi «Dok-1 Maks» sotuvi to‘xtatilganini ma’lum qilgan edi.
29 dekabr kuni Sog‘liqni saqlash vazirligi huzuridagi Farmatsevtika tarmog‘ini rivojlantirish agentligi sobiq direktori Sardor Qoriyev ushbu dori vositalarini sotuvchi ulgurji tashkilotlarga Marion Biotech kompaniyasi tomonidan ishlab chiqarilgan «Ambronol» yo‘tal siropi savdosini to‘xtatib, dorixonalardan qaytarib olishni buyurdi.
30 dekabr kuni agentlik matbuot kotibi Qizlarxon Begmatova O‘zbekistonda 30 dekabrdan boshlab Hindistonning Marion Biotech kompaniyasiga barcha dori-darmonlarni sotish to‘xtatilganini bildirdi. Ular orasida «Sinepar», «Travamax», «Ambronol» va boshqalar bor.
Ixtisoslashgan saytlarda ushbu dorilarni sotishni taqiqlash to‘g‘risida eslatmalar paydo bo‘ldi.
«Gazeta.uz» Toshkent, Buxoro va Xorazm viloyatlaridagi to‘rtta tasodifiy dorixonaga qo‘ng‘iroq qilganida, Quramax tomonidan olib kelingan dori vositalari yo‘qligi yoki sotilishi taqiqlanganini aytishdi.
Avvalroq Hindiston Marion Biotech kompaniyasini ro‘yxatdan o‘tkazish guvohnomasini to‘xtatib qo‘ygani xabar qilingandi. O‘zbekiston farmatsevtika agentligi Hindistonning Toshkentdagi elchixonasiga «Dok-1 Maks» preparatidagi etilenglikol miqdori me’yordan 300 baravar yuqori ekanligini ma’lum qildi.
