Navoiy kon-metallurgiya kombinati 7 aprel kuni Muruntov oltin koni tarkibida Tomdi tumanidagi «Balpantog‘» va «Tomdibuloq» oltin ruda konlari topilgani haqida ma’lum qildi. Bu yerda birinchi portlatish ishlari olib borilib, yuk ko‘tarish ishlari boshlandi.
Yangi konlardan oltin saqlovchi rudalar NKMKning 2-gidrometallurgiya zavodiga 33 km uzunlikdagi temir yo‘l orqali yetkaziladi. Hisob-kitoblarga ko‘ra, konlardagi ruda zahiralari 40 million tonnadan ortiqni tashkil qiladi. Loyiha doirasida 653 ta yangi ish o‘rni yaratilishi kutilmoqda.
Deyarli 15 yil davomida konlarda har yili 3 million tonnadan ortiq oltin saqlovchi ma’dan qazib olinishi kutilmoqda. Bu ishlar uchun 7 ta gidroekskavator, 5 ta burg‘ulash uskunasi, 23 ta samosval, 2 ta teplovoz va boshqa tog‘-kon texnikasi xarid qilish rejalashtirilgan. Bugungi kunga qadar yuk ko‘tarish quvvati 90 tonna bo‘lgan 1 ta gidroekskavator va 10 ta samosval keltirildi.
Muruntov oltin koni 2020 yilda dunyodagi eng yirik oltin konlari reytingida birinchi o‘rinni egalladi. 2020 yilda konda 56,7 tonnaga yaqin oltin qazib olindi.
Oltin O‘zbekistonning asosiy eksport mahsulotidir. 2020 yilda respublika ushbu qimmatbaho metalni 5,8 milliard dollarga (umumiy eksportning 38,3 foizi), 2019 yilda 4,9 milliard dollarga (28,2 foiz) eksport qilgan. 2021 yilda ishlab chiqarilgan mahsulotlar, jumladan, mis va po‘lat eksport bo‘yicha birinchi o‘rinni egallab, oltindan o‘zib ketdi (26,1% ga nisbatan 24,7%), lekin ikki oy ichida oltin yana 2,36 mlrd dollar (57%) eksport hajmi bilan yetakchilik qildi.
