Kitco 2020 йилдаги олтин қазиб олиш бўйича дунёдаги энг катта конлар рўйхатини эълон қилди. Ушбу рўйхатда Навоий вилоятида жойлашган «Мурунтов» кони биринчи ўринни эгаллади.
Маълумотларга кўра, ушбу конда ўтган йили 56,7 тоннага (2 млн унция) яқин олтин қазиб олинган. Ушбу коннинг ресурс-захиралари 4 минг тонна (150 млн унция) дея баҳоланмоқда.
Аналитикларнинг фикрича, «Мурунтов» кони яқин келажакда ҳам энг йирик кон сифатида ўз мақомини сақлаб қолади.
Рейтингда «Мурунтов»дан кейинги ўринларда АҚШда жойлашган «Карлин» (2020 йилда — 45,3 тонна қазиб олинган — 1,6 млн унция) ва Россиянинг «Олимпиада» (34 тонна — 1,2 млн унция) конлари турибди.
Халқаро олтин кенгашининг 2020 йил охиридаги маълумотларига кўра, АҚШдаги Невада олтин конлари йилига 115,8 тонна руда ишлаб чиқаради. Бу сайёрадаги энг юқори кўрсаткичдир. Мурунтов эса дунёдаги энг йирик олтин қазиб олинадиган кон деб тан олинган эди. Ушбу коннинг йиллик ишлаб чиқариш ҳажми 66 тонна дея баҳоланиб, бу борада иккинчи ўринни эгаллаган эди.
