Tadbirkorlarga «Sanitariya-epidemiologik osoyishtalik belgisi»ni berish amaliyoti joriy qilinadi. Bu to‘g‘risida tegishli prezident farmoni qabul qilinganligi haqida Adliya vazirligi xabar berdi.
Unga ko‘ra, 1 oktyabrdan boshlab tadbirkorlarga ularning faoliyati sanitariya qoidalari, normalari va gigiyena normativlariga mosligini o‘rganish va tahlillar natijalariga asosan «Sanitariya-epidemiologik osoyishtalik belgisi»ni berish amaliyoti joriy qilinishi ko‘zda tutilgan.
Belgi Sanitariya-epidemiologiya xizmati tomonidan uch xil turdagi — «yashil», «sariq» va «qizil» toifalar bo‘yicha 12 oy muddatgacha beriladi.
«Yashil» toifadagi belgiga ega bo‘lgan tadbirkorlik sub’ektlarining faoliyati Sanitariya-epidemiologiya xizmati organlari tomonidan o‘rganilishi va tekshirilishiga yo‘l qo‘yilmaydi (ommaviy zaharlanish va guruhli kasalliklar qayd etilgan holatlar bundan mustasno).
Shuningdek, farmonda qayd etilishicha, belgi tadbirkorlik sub’ektlarining tashabbusi bilan (ixtiyoriy) yoki qonun hujjatlarida nazarda tutilgan holatlarda davlat organlari tashabbusi bilan (majburiy) beriladi.
