O‘zgidromet yaqin kunlarda O‘zbekistonda havo harorati bir oz salqinlashi haqida xabar qildi.
Bu hafta boshidan O‘zbekistonning shimoliy hududlariga Volgabo‘yi mintaqasidan havo oqimlari kirib kelishni boshladi. Natijada Qoraqalpog‘iston Respublikasi, Xorazm viloyati va mamlakatning cho‘l mintaqalarida havo harorati keskin tushdi. So‘ngra respublikaning qolgan hududlarida harorat bir oz pasaydi.
24−26 iyul kunlari kunduzgi harorat +37…+40 daraja atrofida bo‘ladi.
Biroq hafta oxiridan mamlakat hududiga janubdan issiq havo oqimlari kirib kelishni boshlaydi. Iyul oxiri va avgust boshida havo juda issiq bo‘ladi. «Ushbu jazirama davrning qancha davom etishini hozircha aytish qiyin», — deya qayd etdi O‘zgidromet.
O‘tgan hafta davomida O‘zbekiston hududi bo‘ylab anomal issiq ob-havo hukmronlik qildi. Havo harorati ko‘p yillik o‘rtacha ko‘rsatkichlardan 5−7 daraja yuqori bo‘ldi. Kunduzi soatlarda havo +40…+43 darajagacha qizigan bo‘lsa, cho‘l hududlari va respublika janubining ayrim joylarida +44…+46 darajaga yetdi.
