Шавкат Мирзиёев сешанба куни Наманган вилоятига ташрифи чоғида Наманган халқаро аэропортини модернизация қилиш лойиҳаси билан танишди.
«Фарғона водийсидан мамлакатимиз воҳаларига довон орқали ўтилади. Поезд қатновлари ҳамма йўналишларда ҳам эмас. Шу боис мазкур аэропорт инфратузилмасини янгилашни ҳаётнинг ўзи тақозо қилмоқда. Бу тадбиркорлик, транспорт хизматлари ва туризм ривожига катта туртки беради», — дейилади президент матбуот хизмати хабарида.
Шавкат Мирзиёев шу куни Наманганда бўлиб ўтган йиғилишда ҳозирда Наманган вилоятида ишлаб чиқарилаётган саноат ва мева-сабзавот маҳсулотлари Тошкент ёки Андижон орқали экспорт қилинаётгани, шу боис ишлаб чиқариш таннархи ошиб бораётганини таъкидлади.
Транспорт вазири Илҳом Маҳкамов (чапда). Фото: Президент матбуот хизмати.
Йўловчи терминалининг сиғимини соатига 1000 кишига етказиш режалаштирилган. Ўтган йилнинг сентябрь ойида аэропортнинг реконструкция қилинган учиб келиш терминали очилганди. Йўловчиларга хизмат кўрсатиш майдони 720 кв. метрдан 1756 кв. метрга етганди. Ўтказувчанлик эса 3 баробарга — соатига 100 дан 300 йўловчига ошган. Жўнаб кетиш терминалини реконструкция қилиш бошлангани маълум қилинган.
Вилоятнинг тадбиркорлик, экспорт ва транзит соҳаларидаги салоҳиятини мустаҳкамлаш учун бўш майдонларда юк терминали, умумий овқатланиш ва ёқилғи қуйиш мажмуалари ҳамда бошқа хўжалик иншоотлари қуриш режалаштирилган.
Лойиҳада исталган турдаги самолётларни қабул қилиш ва уларга хизмат кўрсатиш имконини берувчи махсус сервис техникалари паркини янгилаш ҳам кўзда тутилган.
Президент маҳаллий ва халқаро рейслар сонини кўпайтириш зарурлигини таъкидлади. Чипталарнинг арзонлигини таъминлаш асосий вазифалардан бири бўлиши керак, деди у.
Эслатиб ўтамиз, 2022 йил апрель ойида Ўзбекистон аэропортларини 2035 йилгача ривожлантириш стратегияси доирасида президентга Фарғона водийсидаги аэропортларни ривожлантиришнинг иккита сценарийси тақдим этилган эди. Uzbekistan Airports бошқаруви собиқ раиси Раъно Жўраева биринчи сценарийда мавжуд аэропортларни реконструкция қилиш назарда тутилганини таъкидлаган. Иккинчи сценарийга кўра, 100 километрлик зонада фаолият юритувчи учта «кам қувватли» халқаро аэропорт ўрнига Фарғона водийси учун ягона аэропорт яратиш таклиф этилган.
Раъно Жўраеванинг таъкидлашича, Фарғона водийси вилоятлари марказлари (Наманган, Андижон, Фарғона)даги мавжуд аэропортларнинг камчиликлари уларнинг шаҳар ичида жойлашгани, қўниш учун фақат бир томондан келиши ва учиш-қўниш йўлаклари сиғими чеклангани ҳисобланади — соатига олтита самолёт.
Яқинда реконструкциядан сўнг водийдаги яна бир аэропорт — Қўқон шаҳри аэропорти фойдаланишга топширилди. У 1 апрелдан тўлиқ ишга тушиши керак. Аэропорт 2001 йилдан бери фуқаролик самолётлари учун ёпилган ва ҳарбий ҳаво кучлари томонидан фойдаланилган.
