Фарғона вилоятидаги Қўқон аэропортини реконструкция қилиш ишлари якунланди. 20 март куни эрталаб аэропорт биринчи техник парвозни қабул қилди, дея хабар берди Uzbekistan Airways матбуот хизмати.
Техник рейсни авиакомпаниянинг A320 NEO самолёти экипажи амалга оширди. Вилоят аэропортида учиш-қўниш йўлаги 2000 метргача узайтирилган ҳамда A320 ва ATR72−600 русумли самолётлар учун иккита тўхташ жойига эга перрон реконструкция қилинган. Шунингдек, аэропортда 100 кишига мўлжалланган 900 метр квадрат майдонли янги йўловчи терминали қурилган.
«Uzbekistan Airways авиакомпаниясининг тажрибали учувчилари томонидан Тошкент — Қўқон йўналиши бўйича амалга оширилган техник парвоз аэродромнинг самолётларни қабул қилиш ва жўнатишга ҳамда терминалнинг йўловчиларни қабул қилиш ва уларга хизмат кўрсатишга тўлиқ тайёрлигини кўрсатди», — дейилади хабарда.
Мунтазам парвозлар 1 апрелдан бошланиши режалаштирилган.
Аэропорт 2001 йилда фуқаро авиацияси самолётларини қабул қилишни тўхтатган ва кейинчалик Ўзбекистон Қуролли кучларининг Ҳарбий ҳаво кучлари томонидан фойдаланилган.
