Қонунчилик палатаси спикери ўринбосари, депутат Одилжон Тожиев пора билан қўлга тушган судья ва прокурорлар кўриб чиққан барча материаллар қайта кўрилиши шарт эканини қайд этди. У бу фикрни сўнгги пайтларда ушбу шахслар пора билан қўлга тушиши кўпайгани фонида билдирди.
«Бугун яна бир прокурор пора билан қўлга тушди. Ўтган ҳафта эса Мингбулоқ туман суди раиси пора билан қўлга олинган эди. Афсуски, бундай ишлар одатий ҳолдек ўтиб кетмоқда. Бироқ қонунни амалда қўллаш орқали қонунийликни таъминлаш асосий бурчи бўлган бу каби шахсларнинг ўзлари қонунни бузишаётгани одамларда қонунларга, пировардида эса давлатга бўлган ишончни йўқотади», — дея ёзди Тожиев ўз Telegram каналида.
Унинг қайд этишича, бундай шахсларнинг жиноятига баҳо беришда уларнинг ўтган фаолияти давомида фуқароларга нисбатан тасдиқлаган айблов хулосалари ва қабул қилган қарорларига ҳам баҳо берилиши керак. «Чунки бу каби нолойиқ шахсларнинг ҳаракатлари оқибатида қанчадан-қанча фуқаролар ноҳақ айбланиб, ноҳақ судланиб кетган бўлиши мумкин».
«Фикримча, қонунчиликни мана шу йўналишда такомиллаштириш зарур. Бундай жиноятчи шахслар кўриб чиққан барча материаллар кўтарилиб, қайта кўриб чиқилиши шарт. Шунда адолат тикланади», — дея ўз фикрини якунлаган депутат.
Аввалроқ Навоий вилоятида Ҳакамлик судлари ассоциациясининг вилоятдаги ваколатхонаси ҳузуридаги ҳакамлик суди судьяси, Мингбулоқ туман суди раиси, фуқародан 10 минг доллар олишда гумонланган Олий суд ходими ҳамда Бухоро вилояти Когон тумани прокурори қидирувдаги шахсга қўлланган қамоқ чорасини бекор қилиш ва жиноят иши бўйича енгиллик бериш эвазига 90 минг доллар олишда гумонлангани ҳақида хабарлар берилганди.
