2−4 май кунлари Тошкент шаҳридаги Ғалаба боғида Мудофаа вазирлиги ва Мудофаа саноати агентлиги ҳамкорлигида илк бор мудофаа соҳасидаги инновацион технологиялар фестивали бўлиб ўтди.
Унда 20 га яқин йирик ишлаб чиқариш корхонаси, 50 та ташкилот, 30 нафардан ортиқ жисмоний шахс ва ихтирочи иштирок этди. Улар замонавий технологиялар, металлургия, кимё ва тўқимачилик саноати соҳасида эришилган ютуқлар, шунингдек, Қуролли кучлар учун зарур бўлган иккиламчи маҳсулотларни намойиш этди.
Шунингдек, фестиваль доирасида «Робототехника», «Киберспорт», «Дрон пойгалари», «3D моделлаштириш», «Дрон дизайни», «Дастурлаш» каби етти йўналиш бўйича танловлар ўтказилди.
Танлов давомида техника, алоқа, ахборот-коммуникация технологиялари, ўқув-техник воситалар, дастурий таъминот, авиация, учувчисиз учиш тизимлари, робототехника воситалари, ўқув мажмуалари, асбобларни ҳимоя қилиш, кимёвий технологиялар ва бошқа соҳаларда келгусида фойдаланиш учун рақобатбардош ишлаб чиқариш лойиҳалари ва маҳсулот прототиплари танлаб олинди.
Фестиваль танлов ва фестиваль давомида сараланган иқтидорли ёшлар ва фуқароларга ўз маҳсулотларини ишлаб чиқаришни йўлга қўйиш, уларни мудофаа саноати корхоналари ва заводларида иш билан таъминлаш имконини берди, дея таъкидлади Мудофаа вазирлиги.
Хабарда 2023 йилда Мудофаа саноати агентлиги қайта ташкил этилганидан буён янги ҳарбий завод ва корхоналар қурилгани, мавжудлари эса тўлиқ модернизация қилиниб, замонавий технология ва ускуналар билан жиҳозлангани қайд этилади.
Ҳарбий-техника соҳасида 40 дан ортиқ давлат билан ҳамкорлик йўлга қўйилган, 30 га яқин етакчи хорижий компаниялар билан шартномалар тузилган, 38 та маҳаллий корхона билан алоқалар ўрнатилган. Ўзбекистоннинг ҳарбий завод ва корхоналарида ишлаб чиқарилаётган маҳсулот турлари 155 тага, хизмат кўрсатиш эса 2,5 баробарга ошган.
Бугунги кунда мамлакат ҳарбий завод ва корхоналарида жанговар техника ва енгил зирҳли машиналар, дронлар, оптик асбоблар ва антидронлар, зирҳли дубулғалар, кимёвий ва зарбалардан ҳимоя қилувчи воситалар, шунингдек, иккиламчи маҳсулотлар ишлаб чиқариш йўлга қўйилган.
Фото
