Одамларнинг янгиликлар ва таҳлилларга бўлган эҳтиёжи қондирилмаса, буни бошқа мамлакатлардаги манбалар амалга оширади. Бу ҳақда Шавкат Мирзиёев Хавфсизлик кенгашининг кенгайтирилган йиғилишида сўзлаган нутқида маълум қилди, деб хабар беради «Ўзбекистон 24» телеканалининг «Менимча» кўрсатуви.
Тўғридан-тўғри иқтибос: «Агар биз Ўзбекистон ахборот маконида миллий контент яратишни ўз қўлимизга олмас эканмиз, дунёдаги воқеаларга миллий манфаатларимиз нуқтаи назаридан баҳо бермас эканмиз, бу ишлар хориждан туриб амалга оширилишига имкон яратиб берган бўламиз. Чунки одамлардаги янгилик, таҳлилий маълумотлар, реал воқеаларга бўлган эҳтиёжни биз тўлдирмас эканмиз, буни бошқалар қилади. Бунга мутлақо йўл қўйиб бўлмайди».
Президент нутқида давом этди: «Ҳар қандай танқидга жавоб бериш керак. Журналист ҳақ бўлса, уни тан олишимиз керак. Ноҳақ бўлса, унга тушунтириш орқали ёлғон хабарларнинг олдини олишга ўрганишимиз ва бутун жамиятимизга шуни тушунтиришимиз керак, бу нопок ва ёлғонлигини».
Ўша йиғилишда Шавкат Мирзиёев «глобаллашув, айниқса, ёш авлоднинг қалби ва онги учун кураш кучайиб бораётганини» ҳисобга олган ҳолда ёшларни ҳарбий-ватанпарварлик руҳида тарбиялаш тизимини қайта кўриб чиқиш бўйича топшириқлар бергани ҳақида ёзгандик.
Президент журналистлар меҳнати муҳимлигини, уларнинг фаолиятига аралашишга йўл қўйиб бўлмаслигини бир неча бор таъкидлаган.
2023 йил май ойида Шавкат Мирзиёев оммавий ахборот воситалари ва журналистларни «халқ овози ва фикрини кенг жамоатчилик ва давлат идораларига етказувчи энг таъсирчан куч» деб атаганди. У ўшанда ОАВ эркинлиги кафолатларини эълон қилган, шу билан бирга, уларнинг масъулиятини ҳам эслатган.
Ўтган йилнинг март ойи бошида журналистлар ва ижтимоий фаоллар президентга «яширин, лекин кучли цензура» бўйича мурожаат қилганди. Журналистлар уюшмаси мурожаатга муносабат билдирар экан, «Яқин вақт ичида ҳеч бир таҳририят ва мустақил журналистларга, блогерларга босим ўтказилаётганига ёки бирон-бир ахборотнинг мазмун-моҳиятини ўзгартириш ёки чиқмаслигини талаб қилиш ҳолатларига гувоҳ бўлмадик» қайд этган. Уюшма, аксинча, сўз эркинлигини суиистеъмол қилиш ҳолатлари ҳақида хабар берган.
Февраль ойида Шавкат Мирзиёев матбуот эркинлиги шароитида ишлаш «қийинроқ» эканини тан олганди. Унинг сўзларига кўра, унга «оммавий ахборот воситаларини ёпиш» таклиф қилинган. «Йўқ, ёпмайман… Гапирсин — адолатни гапирсин. Танқид қилсин — тўғри танқид қилсин», деганди у.
Президент июнь ойида ОАВ ходимларини касб байрами билан табриклар экан, сўз эркинлиги, ахборот олиш ва тарқатиш ҳуқуқини таъминлашни Ўзбекистон тараққиёт стратегиясининг ажралмас қисми, деб билишини таъкидлаганди. Унинг қўшимча қилишича, коррупция ва жамиятнинг бошқа муаммоларига қарши курашда давлат журналистларга таянади.
2021 йил февралида эса президент журналистлар билан суҳбатда «адолатни етказишдан тўхтамаслик» лозимлигини айтганди. «Қўрқманглар. Ортингизда президент турибди», — деган эди у.
2022 йил апрель ойида «Газета.uz» Комил Жалиловнинг «Бизнинг ОАВларимиз жим турган пайтда, хориж ОАВлари одамларимиз онгини эгалламоқда» номли мақоласини эълон қилганди. «Қандай қилиб ўзбекистонликлар онгига ўнлаб каналлари бор ва 500 млрд сўмдан кўпроқ бюджетга эга Миллий телерадиокомпания эмас, хорижий мамлакат телеканаллари таъсир кўрсатадиган бўлди?» — сўраган муаллиф ўшанда.
Ўша йилнинг ноябрь ойида, кўплаб рус каналларидан ташқари, IP-телевидение операторлари бир қатор хорижий телеканалларни ўз пакетларига киритди, жумладан, BBC, CNN, Bloomberg, France 24, Хитойнинг CGTN, Туркиянинг TRT Avaz, Беларуснинг «Беларусь 24» телеканаллари ва бошқалар.
