Ўзбекистонда барча ёнилғи қуйиш шохобчаларида Аи-80 бензини нархини чеклаш режалаштирилмоқда. Бу ҳукумат қарори лойиҳасида кўзда тутилган, дея хабар берди Энергетика вазирлиги «Газета.uz»га.
Ушбу маркадаги ёнилғининг максимал нархи 8000 сўм этиб белгиланиши мумкин. Ҳозирда «UNG Petro»да («Ўзбекнефтгаз» таркибида) акциз солиғи бўйича имтиёзлар бекор қилингандан сўнг Аи-80 6800 сўмдан (илгари 6050 сўм эди), хусусий ёнилғи қуйиш шохобчаларида эса 8800 сўмгача сотилмоқда.
Энергетика вазирлиги нархларни чеклаш бўйича ҳужжат лойиҳаси ҳукумат томонидан қўллаб-қувватлангани ва яқин кунларда қабул қилиниши кераклигини таъкидлади.
Аи-92 бензини нархи 9500 сўм бўлиши билан истеъмолчилар босқичма-босқич сифатли бензинга ўтиши кутилмоқда. Юқори октанли бензин таннархини пасайтириш учун уни ишлаб чиқариш ва импорт қилишни кўпайтириш режалаштирилган.
Бундан ташқари, рақобатни ривожлантириш ҳамда хомашё ва қайта ишлаш қувватига эга «Татнефть», «Лукойл», «Газпромнефть», Saneg каби йирик компанияларни мамлакатдаги автомобиль йўллари бўйлаб 80 дан ортиқ янги АЁҚШ мажмуаларини қуришга жалб этиш режалаштирилган. Улардан 59 та ёнилғи қуйиш шохобчасини Saneg, қолган 27 тасини эса бошқа компаниялар қуриши кутилмоқда. Бу борада ҳукуматнинг алоҳида қарори қабул қилинган.
Йирик компанияларнинг пайдо бўлиши маҳсулот сифатини ошириши ва бозордан турли маркадаги бензинни аралаштирадиган ёнилғи қуйиш шохобчаларини сиқиб чиқариши режалаштирилмоқда.
Аввалроқ «газ заправка»лари учун юқори нарх чегараси белгиланган ва газни 3250 сўмдан юқори нархда сотиш тақиқланганди.
Хабар берганимиздек, ўтган йили Аи-80 бензинига аксиз солиғи вақтинча бекор қилиниши туфайли давлат бюджети 100 млн доллар даромадини йўқотган, бироқ Ўзбекистон аҳолиси бу имтиёздан деярли наф кўрмаган. Энергетика вазирлиги бундан асосан тадбиркорлар фойда кўрганини тасдиқлаганди.
