2023 йилнинг январь ноябрь ойларида Ўзбекистонда автомобиль ишлаб чиқариш 355,25 минг донани ташкил этди, бу 2022 йилнинг шу даврига нисбатан (282,2 минг) 25,9 фоизга ёки 73 мингтага кўпдир. Бу ҳақда «Газета.uz» эътибор қаратган Статистика агентлиги маълумотларида келтирилган.
11 ой ичида UzAuto Motors Cobalt ишлаб чиқаришни 90,2 мингтадан 104,57 мингтага (+15,9%), Damas ишлаб чиқаришни 65,5 мингдан 79,8 мингтага (+21,9%), Tracker ишлаб чиқаришни 4916 мингдан 40,74 мингтага (8,3 баробар) оширди. Шунингдек, 29,2 мингта Onix ишлаб чиқарилди.
Gentra (Lacetti) ишлаб чиқариш 80,5 минг донадан 74,2 минг донага қисқарди.
«ADM Jizzax» компанияси Chery гибрид ва электромобилларини ишлаб чиқаришни 25,3 баробарга — 9777 донагача оширди.
Ўзбекистонда автобуслар ишлаб чиқариш 1125 донадан 776 донага (-31%) қисқарди. Бу Тошкент, Самарқанд, Бухоро, Хоразм ва республиканинг бошқа вилоятларига Хитой автобуслари ва электробусларнинг катта партиясини олиб кириш билан бир вақтда юз берди.
Маҳаллий корхоналарда ўтган йилнинг 11 ойида 3686 дона юк автомобиллари ишлаб чиқарилган бўлса, бу йилда 3015 донани ташкил этди.
Шина ишлаб чиқариш 17,5 фоизга камайиб, 712,1 минг донани ташкил этди. Автомобиль двигателлари ишлаб чиқариш 237,5 мингтага (+13,8%), аккумуляторлар ишлаб чиқариш 1,03 миллионтага (+28,9%) ошди.
Йил бошидан буён автомобиллар импорти 1,56 миллиард АҚШ долларини (ўсиш 2,2 баробар), автомобиллар учун эҳтиёт қисмлар 1,34 миллиард долларни (+16,8 фоиз) ташкил этди.
