22 ноябрь куни Олий Мажлис Қонунчилик палатасида бўлиб ўтган ҳукумат соатида депутат Бобур Бекмуродов энергетика вазири Жўрабек Мирзамаҳмудовга Тошкентда кўп қаватли уйлар қурилишининг ошиши энергетика тармоғига қандай таъсир қилаётгани бўйича савол билан юзланди.
«Экспертлар томонидан электр тармоқлари, газ етказиб берувчи ерости инфраструктура эскирган гаплар бўляпти ва шу билан бирга уй қурилиши ҳам давом этяпти. Ўзи бу қурилишлар қилинаётганда бу [факторлар] инобатга олиняптими, йўқми? Ўн йилда қурилмаган уйлар қуриляпти дейишяпти, бу тармоқларни кучланишига етарли даражада жавоб берадими? Умуман, сиз раҳбалик қилаётган вазирликнинг бу борада позицияси қандай?», — дея савол берди Бекмуродов вазирга.
Вазир депутатга ҳозирда янги техник шартлар жорий қилингани, аввалгидек ягона дарча орқали рухсатнома олиш тақиқланганини маълум қилди.
«Аномал совуқдан кейин янги техник шартлар бажарилиши юзасидан қатъий турибмиз. Авваллари ягона дарча орқали автомат равишда рухсатнома олинган бўлса, биз буни президент олдига таклиф билан кирдик ва бу нарса тақиқланди. Биз ҳозир Иқтисодиёт ва молия вазирлиги билан 2030 йилгача бўлган, аввало, ҳудудларни ривожланишини инобатга олган ҳолда дастур тайёрлаяпмиз. Унда қаерга подстанция қуриш керак, қаерга тармоқ тортиш керак, янги генерация қувватлари ниманинг ҳисобидан таъминланиши керак [масалалар кўрилган]» — деди Жўрабек Мирзамаҳмудов.
«Шуни айтиб ўтмоқчиманки, олдинлари Тошкент шаҳрида 5 МW`дан юқориси йирик истеъмолчилар сифатида кўрилган бўлса, ҳозир ҳаттоки 0,5 МW ёки 200 кW уланиш бўлса ҳам Энергетика вазирлиги даражасида, энергия инспекцияни жалб қилган ҳолда амалга оширилади. Шундан кейингина, техник шартлар бериляпти. Айрим ҳолатларда эса техник шартлар бекор қилиниб, инвестор ёки тадбиркор тарафидан янги қурадиган объектига ўзи тармоқ тортиб келиш ёки алоҳида трансформатор қўйиш шартлари қўйиляпти», — деди энергетика вазири.
