Октябрь ойида аҳолининг келгуси 12 ойлик инфляцион кутилмалари 13,7 фоизни ташкил этди. Бу ҳақда Марказий банк томонидан эълон қилинган инфографикада маълумот берилган.
«Аҳоли инфляцион кутилмаларининг пасаювчи динамикаси июль ойигача давом этиб, учинчи чоракдан секин ўсувчи трендга ўтди», — дея қайд этган регулятор.
Эслатиб ўтамиз, аҳолининг нарх кутилмалари сентябрь ойида ўртача 13,5 фоизни ташкил этганди. Октябрда кўрсаткич 0,2 фоиз бандга ортган. Марказий банк сўровномасида иштирок этган 2950 нафар респондентнинг аксарияти келгуси бир йил ичида нархлар ошишига асосан валюта курсининг ўзгариши (59 фоиз), ёқилғи ва энергия қимматлашиши (49 фоиз), коммунал хизматлар нархи (36 фоиз) ошиши таъсир қилишини кутмоқда.
Таъкидлаб ўтиш керакки, октябрь ойидаги инфографикадан бирданига уч турдаги — ҳудудлар, даромадлар ва тадбиркорлик фаолияти кесимидаги маълумотлар тушиб қолган. Эслатиб ўтамиз, сентябрь ойидан бошлаб Марказий банк респондентларнинг инфляцион кутилмалари бўйича жавобларини эълон қилишни тўхтатганди. Август ойида респондентларнинг қарийб 30 фоизи йил охиригача инфляция расмий прогноз қилинган даражада бўлишини (9−12 фоиз) кутаётганди, аммо 13−16, 17−20, 21−25 ва 31−50 фоиз оралиғидаги инфляцияни прогноз қилган респондентлар улушининг ортиши қайд этилган (14 фоиз).
Бизнеснинг кутилмалари
Октябрь ойида тадбиркорлик субъектларининг келгуси 12 ойлик инфляцион кутилмалари ўтган ойга нисбатан бироз ошиб, 14,4 фоизга тенг бўлди. Тадбиркорларнинг кутилмалари бўйича сўровномада жами 1436 нафар респондент иштирок этган. Уларнинг ҳам аксарияти худди аҳоли каби келгуси бир йил ичида нархлар ошишига асосан валюта курсининг ўзгариши (62 фоиз), ёқилғи ва энергия нархи ошиши (47 фоиз), коммунал хизматларнинг (37 фоиз) қимматлашиши таъсир қилишини кутмоқда.
