Футбол бўйича Ўзбекистон миллий терма жамоаси бош мураббийи Сречко Катанец 21 ноябрь куни бўлиб ўтган матбуот анжуманида ЖЧ-2026 саралаш турнирининг 2-тури доирасидаги Эронга қарши ўйиндаги дуранг ҳақида фикр билдирди.
«Футболчиларимни табриклайман. Улар Эрондек жамоага қарши 0:2 ҳисобида „камбек“ қилишди ва ўз характерини кўрсатишди. Лекин биринчи бўлимда биз керакли даражада ўйнамадик, агрессив бўлмадик, рақибни ўйнаши учун имконият бериб қўйдик. Биринчи бўлимдаги иккита голга ўзимиз сабабчимиз. Яна бир бор айтмоқчиманки, 0:2 дан кейин „камбек“ қила олиш жуда яхши. Мен хурсандман, футболчилар ҳам хурсанд», — деди у.
Мураббий иккинчи бўлимда Ўзбекистон томони таржимони қизил карточка олишига сабаб бўлган мураббийлар штаби ўртасидаги можарога ҳам изоҳ берди. У ҳакамларни айбламаслигини айтди, лекин унинг фикрича, улар мезбонлардан кўра Эрон жамоасига кўпроқ ҳурмат кўрсатишди. «Мен буни шундай қабул қилдим, ҳакамларга қарши даъвоим йўқ», — дейди мутахассис.
Унинг сўзларига кўра, бундай можароли вазиятлар ва провокациялар «Эрон томонидан рақиб етакчиликни қўлга киритганда, ўйин тезлигини пасайтириш мақсадида қилинди».
Сречко Катанец Ўзбекистон 0:2 ҳисобида мағлуб бўлган биринчи бўлимдан сўнг футболчиларга кийиниш хонасида нималар деганини айтди. «Мен уларга, эҳтимол, қўрқишаётганини, бунга сабаб биз етарлича агрессив бўлмаганимизни, қаттиқ ўйнамаганимизни, тўпни жуда секин ҳаракатлантирганимизни айтдим. Бу компонентларда эронлик футболчилар яхшироқ эди. Футболчилар бу гапларни тинглашди ва [иккинчи бўлимда кўрсатмаларимни] амалга оширишди», — деди у.
Бош мураббий хориж клубларида тўп сураётган жамоа раҳбарларининг ўйин амалиёти йўқлиги муаммолардан бири эканини таъкидлади. Гап Италиянинг «Каляри» клубида ижара асосида ўйновчи ҳужумчи Элдор Шомуродов, ҳимоячи Ҳусниддин Алиқулов (Туркия «Ризеспор»), ҳимоячи Рустамжон Ашурматов (Россия «Рубин») ҳақида кетмоқда. Унинг фикрича, агар улар етарлича ўйин амалиётига эга бўлса, терма жамоа «20−30 фоизга яхшиланиши мумкин».
«Чет элда тўп сураётган деярли барча футболчилар [мунтазам] ўйнамайди. Бу балки қисқа муддатга яхшидир, лекин [майдонга тушмаслик] бир ой давом этса, мен учун муаммо бўлади. Улар Эронни мағлуб эта оладиган сифатларга эга эканлигини кўришди. Биз ғалаба қозона оламиз, биламан. Лекин улар ўз устида ишлашлари керак, айниқса жисмонан… Лекин умуман олганда мен жамоадан, уларнинг характери ва яхши ўйинчиларидан мамнунман», — дея таъкидлади у.
Журналистлардан бири нега Катанец биринчи дақиқаларданоқ ёш футболчиларни, масалан, Франциянинг «Ленс» клубида тўп сураётган 19 ёшли ҳимоячи Абдуқодир Ҳусанов ва Россиянинг «ЦСКА» жамоасидаги 20 ёшли ярим ҳимоячиси Аббосбек Файзуллаев каби ёш футболчиларни туширмаганини сўради. Мураббийнинг фикрича, ёш футболчилар билан «эҳтиёткор бўлиш керак».
«Сизнингча, мен ёш футболчиларга биринчи дақиқаданоқ бундай масъулият юклашим керакми? Футболчиларнинг психологик ҳолати ҳақида ўйлаш керак. Аста-секин улар базада ўз жойларини эгаллайди. Ҳусановга келсак, у ҳам ўз клубида мунтазам ўйнамайди. Уни қандай бошланғич таркибда туширишим мумкин? Булар ёш футболчилар, улар ўз клубларида ривожланиши керак. Буни [терма жамоада] қилишга вақтимиз йўқ. Терма жамоада 1−2 та машғулот ўтказишимиз мумкин ва тамом… Улар У-20 жамоаси учун яхши ўйин кўрсатади, аммо бу бошқа даража», — дея тушунтирди мутахассис.
Эронга қарши ўйинда гол урган ва голли узатмани амалга оширган ярим ҳимоячи Остон Ўрунов ўйин олдидан мураббий «бугун ютқазишга ҳаққимиз йўқ», деганини айтди. «Биз 0:2 ҳисобидаги ўйинни дуранг натижада билан якунлай олганимиздан хурсандмиз», — деди у.
Ҳужумчи Элдор Шомуродовнинг айтишича, биринчи бўлимдан сўнг футболчилар «қўлини туширмади ва охиригача курашишди». «Ҳамма ҳам натижадан хурсанд эмас, чунки улар ғалабага ишонганди. Лекин бир очко ҳам ёмон эмас, ёмон ўйин кўрсатмадик деб ўйлайман», — деди у.
«Биринчи бўлимда хатолар бўлди, аммо иккинчи бўлимда футболчилар ўзларини йиғиб олишди ва борларини беришди», — деб таъкидлади иккинчи голга муаллифлик қилган ҳужумчи Игор Сергеев.
«Хош, биз ғалаба қозонмадик, лекин дурангга эришдик. Хатолар бўлди, Эрон кучли жамоа, бундай хатоларни кечирмайди. Иккинчи бўлимда бундай хатолар бўлмади, ўтказиб юбормадик ва иккита гол урдик… Провокацияларга келсак, бу Эрон, бу биринчи ўйин эмас, бу янгилик эмас. Эрон бутун умр шундай ўйнайди. Шунчаки бунга тўғри муносабат билдира билиш керак», — деди у.
Эрон бош мураббийи Амир Галенойнинг айтишича, унинг ўйинчилари биринчи бўлимда яхши ўйнаган, аммо иккинчи бўлим «улар учун тугади».
«Иккинчи бўлимда ўзбекистонлик футболчилар ўйин кўрсатишди ва иккита гол уришга муваффақ бўлишди. Футболчиларимиз майдонни айланиб юришди, ўзбек футболчилари эса чин юракдан, масъулият билан ўйнашди… Бу биз учун катта сабоқ бўлди. Ўзимиз учун хулоса чиқардик», — дейди 60 ёшли мутахассис.
