Эндиликда вояга етмаган шахсларга нисбатан жинсий зўравонлик содир этган шахсларнинг болалар билан ишлаши қатъиян ман этилади, дея маълум қилди Олий Мажлис Сенати раиси Танзила Нарбаева.
Қайд этилишича, апрель ойида президент Шавкат Мирзиёев хотин-қизлар ва болалар ҳуқуқлари, эркинликлари ҳамда қонуний манфаатларини ишончли ҳимоя қилиш тизими бўйича айрим қонун ҳужжатларига ўзгартиш ва қўшимчалар киритиш тўғрисидаги қонунни имзолаган. Тузатишлар устида вазирлик ва идоралар, нодавлат ва халқаро ташкилотлар вакиллари, шунингдек, фуқаролик фаоллари, жумладан, Nemolchi.uz зўравонликка қарши курашувчи лойиҳа фаолларидан иборат гуруҳ бир йил давомида ишлаган.
Киритилган ўзгартишларга кўра, вояга етмаганларга нисбатан тазйиқ ва зўравонлик содир этган шахсларнинг болаларга таълим, тарбия бериш, уларни соғломлаштириш, болалар спорти, ижодий ташкилотларда ишлаши тақиқланди.
Худди шу ҳужжатда вояга етмаганларга нисбатан жинсий зўравонлик содир этган шахслар реестрини юритиш тартиби ҳам тасдиқланди.
Унга илгари қуйидаги жиноятларни содир этган шахслар киритилади:
- 18 ёшга тўлмаган жабрланувчининг номусига текканлик ёки унга нисбатан зўрлик ишлатиб, жинсий эҳтиёжни ғайритабиий усулда қондирганлик;
- 18 ёшга тўлмаган шахс билан жинсий алоқада бўлиш ёки жинсий эҳтиёжни ғайритабиий усулда қондириш билан боғлиқ ҳолда жинсий алоқа қилишга мажбур этганлик;
- 16 ёшга тўлмаган шахс билан жинсий алоқа қилганлик ёки жинсий эҳтиёжни ғайритабиий усулда қондирганлик ёки унга нисбатан уятсиз-бузуқ ҳаракатлар қилганлик;
- вояга етмаган шахс тавсифланган ёки тасвирланган порнографик маҳсулотни тарқатиш, реклама қилиш, намойиш этиш мақсадида Ўзбекистонга олиб кирганлик, худди шунингдек уни тайёрлаганлик, тарқатганлик, реклама қилганлик, намойиш этганлик;
- вояга етмаган шахсни порнографик хусусиятга эга ҳаракатларнинг ижрочиси сифатида жалб этганлик, вояга етмаган шахсни жалб этган ҳолда қўшмачилик қилганлик, фоҳишахоналарни ташкил этганлик ёки сақлаганлик;
- терроризм.
Реестр махсус ахборот тизими орқали шакллантирилади ва юритилади.
«Энг муҳим ва эътиборли томони шундаки, реестрга киритилган шахсларни ишга қабул қилиш билан боғлиқ жараёнлар ушбу ахборот тизимидан олинган маълумотлар асосида назорат қилиб борилади», — деди Сенат раҳбари.
Аввалроқ Nemolchi.uz лойиҳаси фаоллари таклиф қилганидек, хабарда ушбу реестр очиқ бўлиши ёки йўқлигига аниқлик киритилмаган.
