Ўзбекистонда поезд чипталарининг арзонлигидан фойдаланган чайқовчилар уларни сотиб олиб, устига пул қўйиб, йўловчиларга қайтадан сотмоқда. Чипта нархларининг арзонлиги уларнинг қўлма-қўл бўлиб кетишига сабаб бўлмоқда. Бу ҳақда «Ўзбекистон темир йўллари» компанияси бошқаруви раисининг биринчи ўринбосари Ҳикматулла Раҳметов шанба куни журналистлар билан суҳбатда маълум қилди, дея ёзади Kun.uz. У чайқовчиларни «сотқинлар» деб атади.
«Чипталаримиз шу қадар арзонки, баъзи одамлар шу билетни сотиб олиб, устига яна қўйиб бошқаларга сотади, сотолмаса, поезд кетишидан олдин 15 минг сўм жаримасини тўлаб қайтариб беради. Агар уни бировга сотса, 15 мингмас, 100 минг, 150 минг сўм фойда қилади. Бизнинг ўзимиз одамларга арзон тарифлар қиламиз, халқ рози бўлсин деб, ўзимиз мана шу коррупцион тизимни яратдик. Мана сизларга оқибат», — деди у.
Шу ойда компания Ўзбекистон бўйлаб поезд чипталари тарифларини оширишни режалаштирмоқда. Барча йўналишлар бўйича чипталар нархи 50 фоизга оширилади. «Афросиёб» тезюрар поездига эса чипталар 100 фоизга қимматлашади.
Бундан ташқари, жарима миқдорини ошириш ҳам режалаштирилган. Бу одамларнинг норозилигини келтириб чиқариши мумкин. Аммо «агар у нарсани қилмасак, кўча чайқовчилар билан тўла бўлади. Тартибли одамлар эса оиласи билан Самарқандга бориш учун чипта сотиб ололмайди ва яна кўчадан ўшандай „афиристларни“ қидириб юради», — деди у.
Ҳикматулла Раҳметовнинг қўшимча қилишича, «битта паспорт — битта чипта» тамойили кассалардаги чипталар тақчиллигига қарши курашишга ёрдам беради.
У 15 доллар пора эвазига Afrosiyob поездида эконом-класс вагонидан ВИП вагонга ўтказишга муваффақ бўлган голландиялик саёҳатчи ва блогер билан содир бўлган воқеага ҳам изоҳ берди. Унинг сўзларига кўра, ушбу муаммони ҳал қилиш учун апгрейд тизимини жорий этиш кўзда тутилган.
««Яъни эконом классда кетаётган йўловчи бизнес классда жой борлигини кўрса, ўша ернинг ўзида бизнес класснинг пулини тўлаб, қонун доирасида шу жойга кираверади. У тўлаган пул эса бюджетга, солиққа тушаверади. Эндиликда расман шу нарсани жорий этамиз. Бу — ҳам бир фойда», — деди у.
Яқинда президент Шавкат Мирзиёев 2024 йилдан бошлаб тезюрар ва тезюрар йўловчи поездлари учун чипталар нархини давлат томонидан тартибга солишни бекор қилиш тўғрисидаги қарорни имзолади. Тарифлар бозор тамойиллари асосида белгиланади.
Сентябрь ойида президент йиғилишда темир йўл соҳасини ислоҳ қилиш зарурлигини маълум қилган эди. Темир йўл корхоналарининг рентабеллиги пастлиги, вагон паркининг бир қисми таъмир ва янгиланишга муҳтожлиги, хусусий секторнинг соҳада иштирок этиши учун имкониятлар яратилмагани, чипталар сотиш ва хизмат кўрсатиш шароитларидаги коррупция ҳолатларидан аҳоли норозилигини таъкидлади.
